Indian Railway: 1 જુલાઈથી રેલ મુસાફરી થશે મોંઘી ! જાણો કઈ ટ્રેનનું ભાડું કેટલું વધશે

Indian Railway: રેલવે મુસાફરો માટે એક મોટા સમાચાર છે. ભારતીય રેલવે 1 જુલાઈથી એસી અને નોન-એસી મેલ અને એક્સપ્રેસ સેવાઓ સહિત લાંબા અંતરની ટ્રેનોની વિવિધ શ્રેણીઓમાં ભાડામાં નજીવો વધારો કરવા જઈ રહી છે. સીએનબીસી અનુસાર, નોન-એસી મેલ અને એક્સપ્રેસ ટ્રેનોના ભાડામાં પ્રતિ કિલોમીટર 1 પૈસાનો વધારો થશે, જ્યારે એસી શ્રેણીના ભાડામાં પ્રતિ કિલોમીટર 2 પૈસાનો વધારો થશે.

1 જુલાઈ, 2025 થી લાગુ થનારા નવા ભાડા માળખા મુજબ, ઉપનગરીય ટ્રેનો અને માસિક સીઝન ટિકિટના ભાડામાં કોઈ ફેરફાર થશે નહીં. સામાન્ય સેકન્ડ ક્લાસમાં 500 કિમી સુધીની મુસાફરી માટેના ભાડામાં પણ કોઈ ફેરફાર કરવામાં આવ્યો નથી.

જોકે, 500 કિમીથી વધુ અંતર માટે, ભાડામાં પ્રતિ કિલોમીટર 0.5 પૈસાનો વધારો થશે.

હવે બધાને નહીં મળે તત્કાલ ટિકિટ

આ ઉપરાંત, રેલ્વે મંત્રાલયે 1 જુલાઈ, 2025 થી IRCTC વેબસાઇટ અને એપ્લિકેશન દ્વારા તમામ તત્કાલ ટિકિટ બુકિંગ માટે આધાર પ્રમાણીકરણ ફરજિયાત બનાવ્યું છે. 10 જૂનના રોજ એક નિર્દેશ દ્વારા જાહેર કરાયેલ આ પગલાનો હેતુ તત્કાલ યોજનાનો દુરુપયોગ અટકાવવા અને ખાતરી કરવાનો છે કે ટિકિટ ફક્ત જરૂરિયાતમંદ વાસ્તવિક મુસાફરોને જ આપવામાં આવે.

રેલ્વે તરફથી સત્તાવાર સૂચનામાં જણાવાયું છે કે "01-07-2025 થી, તત્કાલ યોજના હેઠળ ટિકિટ ફક્ત આધાર પ્રમાણિત યુઝર્સ દ્વારા જ ઇન્ડિયન રેલ્વે કેટરિંગ એન્ડ ટુરિઝમ કોર્પોરેશન (IRCTC) વેબસાઇટ/તેની એપ્લિકેશન દ્વારા બુક કરાવી શકાય છે."

આ પણ વાંચો-ભારત-અમેરિકા વચ્ચે 9 જુલાઈ પહેલાં ટ્રેડ ડીલ ફાઈનલ કરવાના પ્રયાસ, ટેરિફની લટકતી તલવાર