હોમ અને કાર લોન લેનારાઓ માટે રાહતના સમાચાર, RBI ગવર્નરે વ્યાજ દર વધારાનો કર્યો ઇનકાર

જો તમે નવી કાર કે ઘર ખરીદવાનું સપનું જોઈ રહ્યા છો અથવા તો પહેલાથી જ લોન ચાલી રહી છે, તો તમારા માટે એક મોટા રાહતના સમાચાર છે. હાલ પૂરતા તમારી હોમ લોન કે કાર લોનના વ્યાજ દરો વધવાના નથી. રિઝર્વ બેંક ઓફ ઇન્ડિયાના ગવર્નર સંજય મલ્હોત્રાએ 24 જૂને વ્યાજ દરમાં વધારો થવાની તમામ અટકળો પર પૂર્ણવિરામ મૂકી દીધું છે. તેમણે સ્પષ્ટ કર્યું છે કે હાલના તબક્કે મોનેટરી પોલિસીમાં કડકાઈ લાવવી ખૂબ જ ઉતાવળિયું પગલું ગણાશે. જોકે, તેમણે એ પણ સ્વીકાર્યું છે કે આર્થિક વિકાસ અને મોંઘવારીને લઈને હજુ પણ અચોક્કસતાનો માહોલ છે.

આર્થિક ડેટા પર રહેશે RBI ની નજર

મીડિયા સાથેની વાતચીતમાં ગવર્નર મલ્હોત્રાએ જણાવ્યું હતું કે મોનેટરી પોલિસી કમિટીએ જૂન મહિનાની પોલિસીમાં પોતાનું વલણ ન્યૂટ્રલ રાખવાનો નિર્ણય લીધો છે. હાલ અર્થવ્યવસ્થાનું ચિત્ર સંપૂર્ણપણે સ્પષ્ટ નથી.કેન્દ્રીય બેંક ભવિષ્યમાં મોંઘવારી અને આર્થિક ગ્રોથના જોખમોનો તાગ મેળવવા માટે હવે પછી આવનારા આર્થિક ડેટા પર જ નિર્ભર રહેશે. જો RBI ને લાગશે કે ભવિષ્યમાં વ્યાજ દરો વધારવા જરૂરી છે, તો જ તે પોતાનું વલણ ન્યૂટ્રલથી બદલીને રિસ્ટ્રિક્ટિવ કરશે.

રેપો રેટ 5.25 ટકા પર યથાવત કેમ?

આ મહિનાની શરૂઆતમાં જ 6 સભ્યોની મોનેટરી પોલિસી કમિટીએ રેપો રેટમાં કોઈ ફેરફાર ન કરવાનો નિર્ણય લીધો હતો. ભૌગોલિક-રાજકીય તણાવ (જિયોપૉલિટિકલ ટેન્શન), સપ્લાય ચેઈનમાં આવતી અડચણો અને હવામાન સંબંધિત જોખમોને ધ્યાનમાં રાખીને રેપો રેટને 5.25 ટકા પર જાળવી રાખવામાં આવ્યો છે.

મોંઘવારી વધવા પાછળનું મુખ્ય કારણ

વ્યાજ દરો વધવાની ચર્ચા ત્યારે શરૂ થઈ જ્યારે એપ્રિલ અને મે મહિનામાં રિટેલ મોંઘવારી દરમાં મોટો ઉછાળો જોવા મળ્યો.ફેબ્રુઆરીના અંતમાં અમેરિકા અને ઈરાન વચ્ચે શરૂ થયેલી લડાઈને કારણે ક્રૂડ ઓઈલના ભાવ આસમાને પહોંચી ગયા હતા.આંતરરાષ્ટ્રીય બજારમાં ક્રૂડ મોંઘુ થતાં ઓઈલ માર્કેટિંગ કંપનીઓને પેટ્રોલ, ડીઝલ અને ગેસના ભાવ વધારવાની ફરજ પડી હતી.ઈંધણ મોંઘુ થવાની સીધી અસર જીવનજરૂરી ચીજવસ્તુઓ પર પડી અને મોંઘવારી વધી ગઈ.