Supreme Court Judgment: શું તમે પણ તમારો ફ્લેટ ભાડે આપો છો? તો સુપ્રીમ કોર્ટનો આ ચૂકાદો તમારા માટે મોટા સમાચાર છે!

Supreme Court Judgment: જો તમે તમારું મકાન કે ફ્લેટ ખરીદીને તેને ભાડે આપ્યું છે, તો આ સમાચાર ખાસ તમારા માટે છે. ઘણીવાર એવું બને છે કે જ્યારે કોઈ ગ્રાહક બિલ્ડર સામે ફરિયાદ કરે, ત્યારે બિલ્ડર એવો બચાવ કરે છે કે ગ્રાહકે તો પ્રોપર્ટી ભાડે આપી છે, એટલે તે 'ગ્રાહક' (Consumer) નથી પણ વ્યવસાય કરે છે. પરંતુ હવે સુપ્રીમ કોર્ટે આ અંગે એક મહત્વનો અને ઐતિહાસિક ચૂકાદો આપ્યો છે.

સુપ્રીમ કોર્ટે શું કહ્યું..?

સુપ્રીમ કોર્ટની બેન્ચે સ્પષ્ટ શબ્દોમાં કહ્યું છે કે, માત્ર કોઈ રહેણાંક (Residential) ફ્લેટને ભાડે કે લીઝ પર આપવાથી તેનો ખરીદદાર ગ્રાહક સુરક્ષા કાયદા હેઠળ 'ગ્રાહક'ની શ્રેણીમાંથી બહાર નથી થઈ જતો. ન્યાયમૂર્તિ પ્રશાંત કુમાર મિશ્રા અને ન્યાયમૂર્તિ એન.વી. અંજારિયાની પીઠે આ ચૂકાદો આપતા જણાવ્યું હતું કે, જો બિલ્ડર કોઈ ખરીદદારને ગ્રાહકની વ્યાખ્યામાંથી બાકાત રાખવા માંગતો હોય, તો બિલ્ડરે સાબિત કરવું પડશે કે ફ્લેટ ખરીદવાનો મુખ્ય ઉદ્દેશ્ય બિઝનેસ કે કોમર્શિયલ હતો. માત્ર ભાડું મેળવવું એ કોમર્શિયલ હેતુ નથી ગણાતો.

ગ્રાહક કોણ છે? કોર્ટે કરી સ્પષ્ટતા

ગ્રાહક સુરક્ષા અધિનિયમની કલમ 2(1)(D) નો સંદર્ભ આપતા કોર્ટે સમજાવ્યું કે, ગ્રાહક એ વ્યક્તિ છે જે પૈસા આપીને વસ્તુ ખરીદે છે અથવા સેવાઓ લે છે. જો કોઈ વ્યક્તિ ફરીથી વેચવા (Resale) માટે અથવા ધંધાદારી હેતુ માટે સામાન ખરીદે તો તે ગ્રાહક નથી. પરંતુ, સુપ્રીમ કોર્ટે નોંધ્યું કે ફ્લેટને ભાડે આપવો એ કોઈ વાણિજ્યિક પ્રવૃત્તિ નથી. 'કોમર્શિયલ હેતુ' દરેક કેસની હકીકતો અને સંજોગોને આધારે નક્કી થવો જોઈએ, માત્ર અનુમાનના આધારે નહીં.

શું હતો આખો મામલો?

આ આદેશ વિનીત બહરી નામના વ્યક્તિની અપીલ પર આવ્યો છે. આ કેસ રિયલ એસ્ટેટ ગ્રુપ MGF ડેવલપર્સ લિમિટેડ સાથે જોડાયેલો છે.