Tax filing deadline 2025: આજે છેલ્લો દિવસ! આ નાણાકીય કામો પૂર્ણ નહીં કરો તો થશે મોટું નુકસાન

Tax filing deadline 2025: નાણાકીય વર્ષ 2024-25નો આજે છેલ્લો દિવસ છે. જો તમે હજુ સુધી તમારા કેટલાક મહત્વના નાણાકીય કામો પૂર્ણ નથી કર્યા, તો આજે 31 માર્ચ એ તમારા માટે છેલ્લી તક છે. આજે આ કામો નહીં કરવાથી તમને દંડ ભરવો પડી શકે છે અને મુશ્કેલીઓનો સામનો કરવો પડી શકે છે.

અપડેટેડ આવકવેરા રિટર્ન (ITR) ફાઇલ કરવાની આજે છેલ્લી તારીખ

નાણાકીય વર્ષ 2022-23 માટે અપડેટેડ આવકવેરા રિટર્ન (ITR) ફાઇલ કરવાની અંતિમ તારીખ આજે 31 માર્ચ છે. જો તમે આજે આ કામ પૂરું નહીં કરો તો તમારે દંડ ભરવો પડી શકે છે. નાણાકીય વર્ષ 2021-22 માટે પણ અપડેટેડ ITR આજે ફાઇલ કરી શકાય છે. જે ટેક્સપેયર્સે આ વર્ષનું રિટર્ન ફાઇલ નથી કર્યું કે જેમને પોતાના જૂના ITRમાં કોઈ ભૂલ જણાઈ છે, તેઓ ITR-U દ્વારા સુધારો કરી શકે છે. જો ઓછું ટેક્સ ભર્યું હોય તો પણ આજે અપડેટેડ ITR ફાઇલ કરી શકાય છે.

ધારા 80C હેઠળ ટેક્સ છૂટનો લાભ લો

નાણાકીય વર્ષ માટે તમે 1.5 લાખ રૂપિયા સુધીની ટેક્સ છૂટનો લાભ લઈ શકો છો. ELSS મ્યુચ્યુઅલ ફંડ, પબ્લિક પ્રોવિડન્ટ ફંડ (PPF), એમ્પ્લોઈઝ પ્રોવિડન્ટ ફંડ (EPF), નેશનલ સેવિંગ્સ સર્ટિફિકેટ (NSC) અને ટેક્સ-સેવિંગ ફિક્સ્ડ ડિપોઝિટ (FD) જેવી યોજનાઓમાં રોકાણ કરીને તમે ધારા 80C હેઠળ ટેક્સ બચત કરી શકો છો.

દંડથી બચવા ટેક્સની ચુકવણી કરો

જો તમારી કુલ ટેક્સ જવાબદારી (TDS સિવાય) 10,000 રૂપિયાથી વધુ છે, તો આજે 31 માર્ચ સુધીમાં એડવાન્સ ટેક્સની ચુકવણી કરવી જરૂરી છે. નહીં તો તમારે વ્યાજ અને દંડ ભરવો પડી શકે છે.