આજથી લાગુ થઈ રહ્યા છે આ 5 મોટા ફેરફારો, જાણો તમારા ખિસ્સા પર શું પડશે અસર

1 મે, 2025થી ભારતમાં કેટલાક મહત્વના નાણાકીય ફેરફારો લાગૂ થઈ રહ્યા છે, જેની સીધી અસર તમારા ખિસ્સા પર પડી શકે છે. ATMમાંથી પૈસા ઉપાડવાથી લઈને રેલવે ટિકિટ બુકિંગ અને એફડીના વ્યાજદરમાં ઘટાડા સુધી, આ ફેરફારોની જાણકારી રાખવી જરૂરી છે. આ સાથે, રિઝર્વ બેન્ક ઓફ ઈન્ડિયા (RBI)એ મે મહિના માટે બેન્કોની રજાઓની યાદી પણ જાહેર કરી છે, જેની અસર તમારી બેન્કિંગ યોજનાઓ પર પડી શકે છે.

ATMમાંથી પૈસા ઉપાડવા પર ચાર્જમાં વધારો

મેટ્રો શહેરોમાં હવે દર મહિને માત્ર 3 વખત જ ATMમાંથી મફત ટ્રાન્ઝેક્શન કરી શકાશે, જ્યારે નોન-મેટ્રો શહેરોમાં આ મર્યાદા 5 વખત નક્કી કરવામાં આવી છે. આ મર્યાદા પછી દરેક ટ્રાન્ઝેક્શન પર 23 રૂપિયા સુધીનું ચાર્જ લાગી શકે છે. આ ઉપરાંત, બેલેન્સ ચેક કરવાનો ચાર્જ પણ 6 રૂપિયાથી વધારીને 7 રૂપિયા કરવામાં આવ્યો છે.

રેલવે ટિકિટ બુકિંગમાં નવો નિયમ

રેલવેમાં હવે વેઈટિંગ ટિકિટ ફક્ત જનરલ કોચ માટે જ માન્ય રહેશે. એટલે કે, વેઈટિંગ ટિકિટ સાથે તમે સ્લીપર કોચમાં મુસાફરી નહીં કરી શકો. જો તમે મુસાફરી દરમિયાન જનરલ કોચને બદલે સ્લીપર કોચમાં જોવા મળશો, તો ટીટી તમને જનરલ કોચમાં મોકલી શકે છે અથવા દંડ લગાવી શકે છે.

FDના વ્યાજદરમાં ઘટાડો

RBI દ્વારા રેપો રેટમાં 0.25%નો ઘટાડો કરવામાં આવ્યા બાદ, બેન્કોએ એફડી પરના વ્યાજદરમાં ઘટાડો શરૂ કર્યો છે. મોટાભાગની બેન્કોએ હાઇ વ્યાજદર આપતી એફડી યોજનાઓ બંધ કરવાનો નિર્ણય લીધો છે. આ ફેરફારની સીધી અસર એફડી દ્વારા બચત કરનારા લોકો પર પડશે.