Union Budget 2025-26: ઓક્ટોબરના બીજા સપ્તાહથી બજેટ બનાવવાની કવાયત થશે શરૂ, પ્રિ-બજેટ મીટિંગ્સ નવેમ્બરના મધ્ય સુધી રહેશે ચાલુ

Union Budget 2025-26: નાણા મંત્રાલય ઓક્ટોબરના બીજા સપ્તાહથી નાણાકીય વર્ષ 2025-26 માટે સામાન્ય બજેટ તૈયાર કરવાની કવાયત શરૂ કરશે. ભારતીય અર્થતંત્રે સતત 4 નાણાકીય વર્ષમાં 7 ટકા કે તેથી વધુ વૃદ્ધિ નોંધાવી છે. આગામી નાણાકીય વર્ષનું બજેટ વિકાસની ગતિને વધુ વેગ આપવા, રોજગારી સર્જન અને અર્થતંત્રમાં માંગ વધારવાના પગલાં માટે સુધારા પર ધ્યાન કેન્દ્રિત કરશે.

આર્થિક બાબતોના વિભાગ દ્વારા બહાર પાડવામાં આવેલ બજેટ પરિપત્ર 2025-26 જણાવે છે કે, “સચિવ (ખર્ચ)ની અધ્યક્ષતામાં પ્રી-બજેટ મીટિંગ ઓક્ટોબર, 2024ના બીજા સપ્તાહમાં શરૂ થશે. "નાણાકીય સલાહકારો સુનિશ્ચિત કરશે કે જરૂરી વિગતો... 7 ઓક્ટોબર, 2024ના રોજ અથવા તે પહેલાં UBIS (યુનિયન બજેટ ઇન્ફર્મેશન સિસ્ટમ)માં યોગ્ય રીતે દાખલ કરવામાં આવી છે." પરિપત્ર જણાવે છે કે ક્રોસ વેરિફિકેશન માટે ચોક્કસ ફોર્મેટમાં ડેટાની હાર્ડ કોપી પ્રદાન કરવી જોઈએ.

નિર્મલા સીતારમણનું 8મું બજેટ

નરેન્દ્ર મોદી સરકારના ત્રીજા કાર્યકાળનું આ બીજું બજેટ હશે. નાણામંત્રી નિર્મલા સીતારમણનું આ સતત આઠમું બજેટ હશે. નિવેદન અનુસાર, નાણાકીય વર્ષ 2025-26 માટેના બજેટ અંદાજોને પ્રી-બજેટ મીટિંગ્સ પૂર્ણ થયા પછી કામચલાઉ રીતે અંતિમ સ્વરૂપ આપવામાં આવશે. પ્રી-બજેટ બેઠકો ઓક્ટોબર, 2024ના બીજા સપ્તાહથી શરૂ થશે અને નવેમ્બર, 2024ના મધ્ય સુધી ચાલશે.