શેરબજારમાં કડાકા વચ્ચે પારસ ડિફેન્સના શેરમાં ભારી ઉછાળો, સાઉથ કોરિયા સાથે ડીલ થતાં જ 10% દોડ્યો

Paras Defence Share Price: ભારતીય શેરબજારમાં અત્યારે ભારે ઉથલપાથલ અને ઘટાડો જોવા મળી રહ્યો છે. પરંતુ આ કડાકા વચ્ચે પણ અમુક શેરો રોકાણકારોને જબરદસ્ત રિટર્ન આપી રહ્યા છે. આવો જ એક મજબૂત શેર છે પારસ ડિફેન્સ એન્ડ સ્પેસ ટેકનોલોજીસ લિમિટેડ (Paras Defence and Space Technologies Ltd). તાજેતરમાં કંપનીએ એક મોટી ડીલ કરી છે, જેના સમાચાર આવતા જ શેરમાં ભારે ખરીદી જોવા મળી છે.

શેરમાં 10% થી વધુનો ઉછાળો

બુધવારે, 4 માર્ચના રોજ પારસ ડિફેન્સના શેરમાં 10% થી વધુનો મોટો ઉછાળો જોવા મળ્યો હતો. સવારે 11:19 વાગ્યે આ શેર 7.73% ના ઉછાળા સાથે 728.55 પર ટ્રેડ થઈ રહ્યો હતો. એક તરફ જ્યાં સેન્સેક્સ 1.72% ઘટીને 78,860.85 ના સ્તર પર હતો, ત્યારે આ ડિફેન્સ શેર રોકેટની જેમ ભાગી રહ્યો હતો. નોંધનીય છે કે, છેલ્લા ચાર સેશનમાં જ આ શેર 12% થી વધુ વધ્યો છે.

શેર વધવા પાછળનું મુખ્ય કારણ: સાઉથ કોરિયા સાથે ડીલ

શેરમાં આવેલી આ શાનદાર તેજી પાછળનું મુખ્ય કારણ એક ડીલ છે. પારસ ડિફેન્સે સાઉથ કોરિયાની પ્રખ્યાત કંપની ‘ગ્રીન ઓપ્ટિક્સ' (Green Optics) સાથે એક મેમોરેન્ડમ ઓફ અંડરસ્ટેન્ડિંગ (MoU) સાઇન કર્યું છે. ગ્રીન ઓપ્ટિક્સ સ્પેસ અને ડિફેન્સ માટે ઓપ્ટિક્સ અને ઓપ્ટિકલ સિસ્ટમ્સની ડિઝાઇન અને મેન્યુફેક્ચરિંગમાં સ્પેશિયાલિસ્ટ છે. એક્સચેન્જ ફાઇલિંગમાં કંપનીએ જણાવ્યું છે કે આ ડીલનો મુખ્ય હેતુ સ્પેસ અને ડિફેન્સ સેક્ટરમાં બંને કંપનીઓ સાથે મળીને નવી પ્રોડક્ટ્સ બનાવશે અને પોતાના બિઝનેસનો વિસ્તાર કરશે.

હિમાંશી થર્મલ સોલ્યુશન્સમાં 49% હિસ્સો ખરીદ્યો

આ વિદેશી ડીલ ઉપરાંત, પારસ ડિફેન્સે હાલમાં જ ડેફસ્પેસ ટેકનોલોજીસ પાસેથી હિમાંશી થર્મલ સોલ્યુશન્સમાં 49% હિસ્સો ખરીદ્યો છે. આ સાથે જ તે પારસ ડિફેન્સની એસોસિએટ કંપની બની ગઈ છે. કંપનીના મેનેજમેન્ટ મુજબ, આ ડીલ ભવિષ્યના વિકાસ અને બિઝનેસમાં નવી તકો ઊભી કરવા માટે ખૂબ મહત્વની સાબિત થશે.