Dengue Vaccine India: ભારતમાં ઘણા સમયથી ડેન્ગ્યુની રસી વિશે ચર્ચાઓ ચાલી રહી હતી, પરંતુ હવે લોકોનો ઇંતજાર પૂરો થવા જઈ રહ્યો છે. મચ્છર કરડવાથી થતા આ જીવલેણ રોગ સામે રક્ષણ આપવા માટે ભારતમાં ટૂંક સમયમાં જ રસી ઉપલબ્ધ થશે. જાપાનની ફાર્માસ્યુટિકલ કંપની સાથે થયેલા એક મહત્વના કરાર બાદ ભારતમાં ડેન્ગ્યુ વેક્સીનના વિતરણનો રસ્તો એકદમ સાફ થઈ ગયો છે.
ડેન્ગ્યુની રસીને લઈને મોટા સમાચાર: જાપાનની તાકેડા ફાર્મા સાથે ડીલ ફાઇનલ, જાણો ભારતમાં ક્યારથી મળશે ‘Qdenga' વેક્સીન
Dengue Vaccine India: ભારતમાં ડેન્ગ્યુની રસીની રાહ જોતા લોકો માટે સારા સમાચાર! ડો. રેડ્ડીઝ અને જાપાનની તાકેડા ફાર્મા વચ્ચે ડીલ થઈ. જાણો ભારતમાં 2027 થી મળનારી 'Qdenga' વેક્સીન વિશે બધું જ.
MoneyControl Newsઅપડેટેડ Sep 18, 2026 પર 7:52 PM
ડો. રેડ્ડીઝ અને તાકેડા ફાર્મા વચ્ચે મોટી ડીલ
ભારતની જાણીતી દવા કંપની ડો. રેડ્ડીઝ લેબોરેટરીઝે જાપાની કંપની તાકેડા ફાર્માસ્યુટિકલ સાથે એક ખાસ ભાગીદારી કરી છે. આ કરાર મુજબ, ડો. રેડ્ડીઝ ભારતમાં તાકેડાની ડેન્ગ્યુ વેક્સીન ‘ક્યુડેન્ગા'નું પ્રમોશન અને વિતરણ કરશે.
ભારતીય દવા નિયામકે જુલાઈ મહિનામાં જ આ રસીને મંજૂરી આપી દીધી હતી. ન્યૂઝ એજન્સી રોઇટર્સના લેટેસ્ટ રિપોર્ટ અનુસાર, આ વેક્સીન વર્ષ 2027 ના પ્રથમ છ મહિનામાં ભારતીય બજારમાં સામાન્ય લોકો માટે ઉપલબ્ધ થઈ જવાની પૂરી શક્યતા છે.
ક્યુડેન્ગા રસી શું છે અને કોણ લઈ શકશે?
તાકેડા ફાર્મા દ્વારા વિકસાવવામાં આવેલી 'ક્યુડેન્ગા' રસી વિશે કેટલીક ખાસ વાતો નીચે મુજબ છે:
ઉંમર: આ રસી 4 થી 60 વર્ષની ઉંમરના કોઈપણ વ્યક્તિને ડેન્ગ્યુથી બચાવવા માટે આપી શકાશે.
વાયરસ સામે રક્ષણ: આ રસી એવી રીતે બનાવવામાં આવી છે કે તે ડેન્ગ્યુના તમામ 4 વાયરસ સીરોટાઇપ સામે લડવામાં સક્ષમ છે.
ડોઝ: આ વેક્સીનના 0.5 મિલી (ml) ના બે ડોઝ ઇન્જેક્શન દ્વારા આપવામાં આવશે. બંને ડોઝ વચ્ચે 3 મહિનાનો ગેપ રાખવામાં આવશે.
પ્રી-ટેસ્ટિંગની જરૂર નથી: સૌથી મોટી રાહતની વાત એ છે કે, જે લોકોને ભૂતકાળમાં ક્યારેય ડેન્ગ્યુ નથી થયો તેઓ પણ આ રસી લઈ શકશે. આનાથી રસી લેતા પહેલા કરવા પડતા ડેન્ગ્યુ ટેસ્ટિંગની ઝંઝટ ખતમ થઈ જશે.
રસી કેટલી અસરકારક છે?
તાજેતરમાં થયેલા લેટ-સ્ટેજ ટ્રાયલના પરિણામો ખૂબ જ ઉત્સાહજનક છે. રસીનો બીજો ડોઝ લીધાના એક વર્ષ પછી, આ વેક્સીન ડેન્ગ્યુ સામે 80.2% જેટલી અસરકારક સાબિત થઈ છે. એટલું જ નહીં, 18 મહિના પછી પણ ડેન્ગ્યુને કારણે હોસ્પિટલમાં દાખલ થવા પડે તેવી ગંભીર સ્થિતિ સામે તે 90.4% જેટલું જોરદાર રક્ષણ આપે છે.
ભારતમાં ડેન્ગ્યુનો વધતો ખતરો અને 2025ના આંકડા
ભારતમાં ખાસ કરીને ચોમાસા દરમિયાન અને ત્યારબાદ ભરાયેલા પાણીમાં એડીસ મચ્છરોનો ઉપદ્રવ વધે છે, જે ડેન્ગ્યુ ફેલાવે છે. તાકેડા કંપનીના જણાવ્યા અનુસાર, છેલ્લા બે દાયકામાં ભારતમાં ડેન્ગ્યુના કેસોમાં સીધો 11 ગણો વધારો જોવા મળ્યો છે.
નેશનલ સેન્ટર ફોર વેક્ટર બોર્ન ડિસીઝ કંટ્રોલ (NCVBDC) ના લેટેસ્ટ કામચલાઉ ડેટા પર નજર કરીએ તો, વર્ષ 2025માં ભારતમાં ડેન્ગ્યુના 1,13,450 કેસ નોંધાયા છે અને આ જીવલેણ બીમારીના કારણે 95 લોકોએ પોતાનો જીવ ગુમાવ્યો છે. આ આંકડાઓ દર્શાવે છે કે ભારતને આ રસીની કેટલી સખત જરૂર છે.
કંપનીનો ભવિષ્યનો લક્ષ્યાંક
આ વધતી માંગને પહોંચી વળવા માટે તાકેડા ફાર્માસ્યુટિકલે મોટી તૈયારી કરી છે. કંપનીનું લક્ષ્ય છે કે વર્ષ 2030 સુધીમાં તેઓ દર વર્ષે 10 કરોડ ડોઝ બનાવવાની વૈશ્વિક ઉત્પાદન ક્ષમતા હાંસલ કરી લેશે, જેથી ભારત સહિત આખી દુનિયામાં ડેન્ગ્યુના પ્રકોપને કાબૂમાં લઈ શકાય. ટૂંકમાં, વર્ષ 2027 થી ભારતીયોને ડેન્ગ્યુના ડરમાંથી મુક્તિ અપાવવા માટે 'Qdenga' રસી એક ગેમ-ચેન્જર સાબિત થઈ શકે છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.