Britannia Share Price: બ્રિટાનિયા ઇન્ડસ્ટ્રીઝ (Britannia Industries) ના રોકાણકારો માટે થોડા આશ્ચર્યજનક સમાચાર છે. કંપનીએ 7 મેના રોજ તેના માર્ચ ક્વાર્ટરના પરિણામો જાહેર કર્યા હતા. રિઝલ્ટમાં કંપનીનો નફો ખૂબ જ શાનદાર રહ્યો છે, તેમ છતાં 8 મેના રોજ કંપનીના શેરમાં મોટો ઘટાડો જોવા મળ્યો હતો. માર્ચ ક્વાર્ટરમાં કંપનીનો નફો 21.2 ટકા વધ્યો હોવા છતાં શેર કેમ ગગડ્યો તે દરેક રોકાણકાર જાણવા માંગે છે.
Britannia Share Price: શાનદાર પ્રોફિટ છતાં બ્રિટાનિયાનો શેર કેમ કડડભૂસ થયો? જાણો ઘટાડાનું અસલી કારણ
Britannia Industriesનો માર્ચ ક્વાર્ટરનો નફો 21.2% વધીને 678 કરોડ થયો હોવા છતાં શેરના ભાવ કેમ ગગડ્યા? જાણો કંપનીના પ્રોડક્ટ ભાવ વધારા અને માર્કેટના લેટેસ્ટ ન્યૂઝ.
MoneyControl Newsઅપડેટેડ May 08, 2026 પર 12:04 PM
શેરમાં ઘટાડા પાછળનું મુખ્ય કારણ શું છે?
શેરમાં આવેલા ઘટાડા પાછળનું મુખ્ય કારણ કંપનીની એક નવી જાહેરાત છે. બ્રિટાનિયાએ કહ્યું છે કે તે ટૂંક સમયમાં પોતાના પ્રોડક્ટ્સના ભાવ વધારવા જઈ રહી છે. 28 ફેબ્રુઆરીથી અમેરિકા અને ઈરાન વચ્ચે ચાલી રહેલા ટેન્શનની સીધી અસર ક્રૂડ ઓઇલ અને અન્ય કોમોડિટીના ભાવ પર પડી છે. આનાથી કંપનીની ફ્રેટ કોસ્ટ (માલભાડાનો ખર્ચ) ખૂબ વધી ગઈ છે.
ખર્ચ વધતા કંપનીઓ પોતાના પ્રોડક્ટના ભાવ વધારવા મજબૂર બની છે, કારણ કે જો ભાવ ન વધારે તો તેમના પ્રોફિટ માર્જિન પર ખરાબ અસર પડી શકે છે. આ ઉપરાંત, કેટલીક બ્રોકરેજ ફર્મોએ ભવિષ્યમાં કંપનીના સેલ્સમાં ઘટાડો થવાની આશંકા પણ વ્યક્ત કરી છે, જેના કારણે રોકાણકારોએ વેચવાલી કરી હતી.
શેરના ભાવમાં કેટલો ઘટાડો થયો?
આ જ નકારાત્મક સેન્ટિમેન્ટને કારણે, 8 મેના રોજ બ્રિટાનિયાનો શેર નબળો ખુલ્યો હતો. થોડા જ સમયમાં તે 4.2 ટકા તૂટીને 5,571 રૂપિયા પર પહોંચી ગયો હતો. સવારે 11:30 વાગ્યાની આસપાસ શેર 4.54 ટકાના મોટા ઘટાડા સાથે 5,550 રૂપિયા પર ટ્રેડ થઈ રહ્યો હતો. નોંધનીય છે કે આ વર્ષે બ્રિટાનિયાના શેરમાં અત્યાર સુધીમાં 7 ટકાથી વધુનો ઘટાડો નોંધાઈ ચૂક્યો છે.
માર્ચ ક્વાર્ટરના શાનદાર આંકડા (Financial Results)
એક તરફ શેર ઘટી રહ્યો છે, તો બીજી તરફ કંપનીનું રિઝલ્ટ બજારના અંદાજ કરતા વધુ સારું આવ્યું છે. માર્ચ ક્વાર્ટરમાં કંપનીનો કન્સોલિડેટેડ પ્રોફિટ (નફો) વર્ષ દર વર્ષના આધારે 21.2 ટકા વધીને 678 કરોડ રૂપિયા રહ્યો છે. ગયા વર્ષે આ જ સમયે નફો 559.13 કરોડ રૂપિયા હતો. માર્કેટ એનાલિસ્ટ્સે 670 કરોડ રૂપિયાના નફાનો અંદાજ લગાવ્યો હતો, એટલે કે કંપનીએ અપેક્ષા કરતા વધુ સારું પ્રદર્શન કર્યું છે. પ્રોડક્ટ સેલ્સમાંથી કંપનીની આવક (રેવેન્યુ) 7 ટકા વધીને 4,685.95 કરોડ રૂપિયા થઈ છે. ઓપરેશન્સમાંથી થતી આવક 6.46 ટકા વધીને 4,718.92 કરોડ રૂપિયા રહી છે. જોકે, કંપનીનો કુલ ખર્ચ પણ 6.2 ટકા વધીને 3,969.96 કરોડ રૂપિયા થયો છે.
કંપનીની ભવિષ્યની રણનીતિ
કંપનીએ સ્પષ્ટ કર્યું છે કે સપ્લાય ચેન પરનું દબાણ ઘટાડવા માટે તેઓ મે મહિનાના મધ્યથી ભારત તેમજ વિદેશમાં રહેલા તેમના પ્લાન્ટ્સમાંથી સોર્સિંગ વધારશે. કન્ઝ્યુમર ગુડ્સ કન્સલ્ટન્ટ અક્ષય ડીસુઝાએ આ અંગે જણાવ્યું હતું કે, "સામાન્ય રીતે FMCG કંપનીઓ પહેલા ક્વાર્ટરમાં ભાવ વધારતી હોય છે. પરંતુ હાલની ભૌગોલિક સ્થિતિ જોતા, પ્રોડક્ટની કિંમતો વધારવા છતાં કાચા માલ (ઇનપુટ કોસ્ટ) માં થયેલા વધારાની સંપૂર્ણ ભરપાઈ થઈ શકશે નહીં."
શેરબજારનો ઓવરઓલ માહોલ
આ દિવસે માત્ર બ્રિટાનિયા જ નહીં, પરંતુ ઓવરઓલ શેરબજારમાં પણ નબળાઈ જોવા મળી હતી. માર્કેટના આંકડા મુજબ નિફ્ટી (Nifty) 119 પોઈન્ટ (0.49%) ઘટીને 24,207 પર ટ્રેડ કરી રહ્યો હતો. જ્યારે સેન્સેક્સ (Sensex) 422 પોઈન્ટ (0.54%) ઘટીને 77,426 પર હતો. બેન્ક નિફ્ટીમાં પણ 0.91 ટકાનો મોટો ઘટાડો જોવા મળ્યો હતો.
ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.