Annu Projects IPO: શેરબજારમાં ક્યારેક ભારે નફો થાય છે તો ક્યારેક મોટું નુકસાન. આવું જ કંઈક ટેલિકોમ અને ગેસ પાઇપલાઇન સેક્ટરની EPC કંપની અન્નૂ પ્રોજેક્ટ્સના રોકાણકારો સાથે થયું છે. લિસ્ટિંગ થયાના માત્ર 12 કારોબારી દિવસોમાં જ આ શેરે રોકાણકારોના લગભગ અડધા પૈસા ડૂબાડી દીધા છે. ગ્રે માર્કેટમાં નબળા લિસ્ટિંગના સંકેતો તો પહેલેથી જ હતા, પણ માર્કેટમાં આટલી ખરાબ સ્થિતિ થશે તેનો કોઈને અંદાજ નહોતો.
Annu Projects IPO: 12 દિવસમાં રોકાણકારોના અડધા પૈસા ડૂબ્યા, જાણો કેમ સતત તૂટી રહ્યો છે આ શેર?
અન્નૂ પ્રોજેક્ટ્સના IPOમાં રોકાણ કરનારાઓને મોટો ઝટકો. માત્ર 12 દિવસમાં શેરના ભાવ 50% થી વધુ તૂટ્યા. જાણો આ ભારે ઘટાડા પાછળના મુખ્ય 5 કારણો અને લેટેસ્ટ અપડેટ.
MoneyControl Newsઅપડેટેડ Sep 20, 2026 પર 10:44 AM
કેવી રહી શેરની અત્યાર સુધીની સફર?
અન્નૂ પ્રોજેક્ટ્સના શેર IPO રોકાણકારોને 99ના ભાવે આપવામાં આવ્યા હતા. પરંતુ 2 સપ્ટેમ્બરના રોજ BSE પર તેનું લિસ્ટિંગ ભારે ડિસ્કાઉન્ટ સાથે 75ના ભાવે થયું હતું.
લિસ્ટિંગ બાદ શેરે થોડી રિકવરી બતાવી અને 78.74 ની ઉપલી સર્કિટ સુધી પહોંચ્યો હતો.પરંતુ ત્યારપછી નફાવસૂલીનો એવો દૌર શરૂ થયો કે માત્ર ત્રણ અઠવાડિયામાં જ શેરનો ભાવ 46.56 ના રેકોર્ડ નીચલા સ્તરે પહોંચી ગયો. આ ઘટાડો IPOની મૂળ કિંમત કરતા લગભગ 52.97% જેટલો છે. નવાઈની વાત એ છે કે, 12 કારોબારી દિવસોમાંથી 8 દિવસ તો શેરમાં 5%ની લોઅર સર્કિટ લાગી છે. માત્ર 10 સપ્ટેમ્બર અને 18 સપ્ટેમ્બરે જ શેર લીલા નિશાનમાં બંધ થયો હતો. હાલમાં આ શેરની સર્કિટ લિમિટ 20% કરવામાં આવી છે અને છેલ્લે તે 50.48 ના ભાવે બંધ થયો હતો.
કાગળ પર કંપનીની નાણાકીય સ્થિતિ મજબૂત
આટલા ભારે ઘટાડા છતાં, જો કંપનીના નાણાકીય આંકડાઓ જોઈએ તો તે ઘણા મજબૂત દેખાય છે, કંપનીનો ચોખ્ખો નફો વાર્ષિક 38%ના CAGRની ઝડપે વધીને 33.03 કરોડ થયો છે. કુલ આવક 25% થી વધુના વધારા સાથે 244.59 કરોડ સુધી પહોંચી છે. કંપની પાસે રિઝર્વ અને સરપ્લસમાં 107.45 કરોડ પડ્યા છે, જ્યારે કુલ દેવું 52.54 કરોડ છે. જોકે, ચિંતાની વાત એ છે કે પ્રમોટર્સનું હોલ્ડિંગ લિસ્ટિંગ પછી 89.11% થી ઘટીને સીધું 65.05% થઈ ગયું છે.
શેરમાં આટલા ભારે દબાણના મુખ્ય કારણો
રોકાણકારોના મનમાં સૌથી મોટો પ્રશ્ન એ છે કે ફંડામેન્ટલ સારા હોવા છતાં શેર કેમ ઘટી રહ્યો છે? તેના મુખ્ય કારણો નીચે મુજબ છે.
બજારનો નબળો માહોલ: જિયો-પોલિટિકલ ટેન્શનના કારણે 2 સપ્ટેમ્બરથી નિફ્ટી 50 (Nifty 50) માં પણ 3% નો ઘટાડો જોવા મળ્યો છે.
ગ્રાહકો પર વધુ પડતી નિર્ભરતા: કંપનીની 94.17% આવક માત્ર ટેલિકોમ અને સીવરેજ ઈન્ફ્રામાંથી આવે છે. જ્યારે ગેસ પાઇપલાઇનમાંથી માત્ર 4.03% આવક થાય છે. આ ઉપરાંત કંપનીની 97.96% આવક માત્ર તેના ટોપ-10 ક્લાયન્ટ્સ પાસેથી જ મળે છે.
ભૌગોલિક જોખમ: કંપનીનો 64% બિઝનેસ માત્ર બિહાર, ગોવા અને પશ્ચિમ બંગાળ પૂરતો સીમિત છે, જેમાં 32% બિઝનેસ એકલા બિહારમાંથી આવે છે.
નેગેટિવ કેશ ફ્લો અને સપ્લાયર્સ: ઓપરેટિંગ પ્રવૃત્તિઓમાંથી કંપનીનો નેટ કેશ ફ્લો નેગેટિવ રહ્યો છે. સાથે જ તેના ટોપ-10 સપ્લાયર્સ પર તેની નિર્ભરતા 67.92% છે.
પૈસાની વસૂલાતમાં વિલંબ : કંપની સામે સૌથી મોટું જોખમ એ છે કે ગ્રાહકો પાસેથી પૈસા વસૂલવામાં લાગતો સમય સતત વધી રહ્યો છે. તાજેતરના આંકડા મુજબ આ સમયગાળો 138 દિવસથી વધીને હવે 237 દિવસ સુધી પહોંચી ગયો છે, જે કંપનીની કાર્યક્ષમતા પર સવાલ ઉભા કરે છે.
આગળ કઈ વાત પર રહેશે નજર?
નીચલા સ્તરેથી શેરમાં થોડી રિકવરી જરૂર જોવા મળી છે, પરંતુ તેની ભવિષ્યની ચાલ માર્કેટ સેન્ટિમેન્ટ પર આધાર રાખશે. રોકાણકારોની નજર હવે કંપનીના આગામી ત્રિમાસિક પરિણામો પર ટકેલી છે. 23 સપ્ટેમ્બરના રોજ કંપનીના બોર્ડની બેઠક યોજાવાની છે, જેમાં જૂન ક્વાર્ટરના પરિણામો જાહેર થઈ શકે છે. આ પરિણામો જ નક્કી કરશે કે રોકાણકારોને રાહત મળશે કે હજુ નુકસાન સહન કરવું પડશે.
ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.