દિલ્હીમાં ઇન્ટરનેટ અને પ્રોપર્ટી દુનિયામાં સૌથી સસ્તા, પરંતુ પગારમાં સાવ પાછળ, દુનિયાના 69 શહેરોનો ચોંકાવનારો રિપોર્ટ

દેશની રાજધાની દિલ્હીમાં રહેવાના ખર્ચ અંગે એક અત્યંત રસપ્રદ અને ચોંકાવનારો રિપોર્ટ સામે આવ્યો છે. ડોઇશ બેંક દ્વારા 'મેપિંગ ધ વર્લ્ડ્સ પ્રાઇસ 2026' નામનો લેટેસ્ટ રિપોર્ટ જાહેર કરવામાં આવ્યો છે. આ રિપોર્ટમાં દુનિયાના 69 મોટા શહેરોના રહેણીકરણીના ખર્ચ અને જીવનધોરણની સરખામણી કરવામાં આવી છે. આ રિપોર્ટ મુજબ, દિલ્હીમાં ભલે પ્રોપર્ટી ખરીદવી અને ઇન્ટરનેટ વાપરવું દુનિયામાં સૌથી સસ્તું હોય, પરંતુ જ્યારે વાત લોકોના પગારની આવે છે, ત્યારે દિલ્હી દુનિયાના અન્ય મોટા શહેરોની સરખામણીમાં ઘણું પાછળ રહી જાય છે.

દુનિયાનું સૌથી સસ્તું બ્રોડબેન્ડ ઇન્ટરનેટ દિલ્હીમાં

આજના સમયમાં ઇન્ટરનેટ જીવનની જરૂરિયાત બની ગયું છે. આ રિપોર્ટમાં જાણવા મળ્યું છે કે સર્વેમાં સામેલ 69 શહેરોમાંથી દિલ્હીમાં દુનિયાનું સૌથી સસ્તું બ્રોડબેન્ડ ઇન્ટરનેટ મળે છે. દિલ્હીમાં એક મહિનાના ઇન્ટરનેટ કનેક્શનનો ખર્ચ માત્ર 7.3 ડોલર (અંદાજે 703 રૂપિયા) આવે છે.

'રોમેન્ટિક ડેટ' માટે પણ દિલ્હી સૌથી સસ્તું

જો તમે તમારા પાર્ટનર સાથે 'રોમેન્ટિક ડેટ' પર જવા માંગો છો, તો દિલ્હી દુનિયામાં સૌથી સસ્તો વિકલ્પ છે. દિલ્હીમાં એક ડેટનો સરેરાશ ખર્ચ 103 ડોલર (લગભગ 9,920 રૂપિયા) આવે છે. આ ખર્ચમાં બે લોકોનું જમવાનું, વાઇનની બોટલ, કપડાં, કોફી, સિનેમાની ટિકિટ અને 5 કિલોમીટર સુધીનું ટેક્સી ભાડું સામેલ કરવામાં આવ્યું છે. તેની સરખામણીમાં સ્વિટ્ઝરલેન્ડનું જીનિવા શહેર આ યાદીમાં સૌથી મોંઘુ છે, જ્યાં એક ડેટ માટે 475 ડોલર (અંદાજે 45,750 રૂપિયા) ખર્ચવા પડે છે.

પગાર બાબતે દિલ્હી છેક તળિયે

આંતરરાષ્ટ્રીય સ્તરે ભલે દિલ્હી સસ્તું લાગતું હોય, પણ કમાણીની વાત આવે ત્યારે દિલ્હીવાસીઓ પાછળ છે. 2026 ના ડેટા મુજબ, પગારના મામલે 69 શહેરોના લિસ્ટમાં દિલ્હી 66માં સ્થાને છે. દિલ્હીનો સરેરાશ નેટ મંથલી પગાર 538 ડોલર (આશરે 51,800 રૂપિયા) છે, જે ન્યૂયોર્કના લોકોના પગારના માત્ર 10 ટકા જેટલો જ છે. છેલ્લા એક દાયકામાં ડોલરના મૂલ્યમાં ગણતરી કરીએ તો દિલ્હીમાં પગારમાં 17.7 ટકાનો ઘટાડો જોવા મળ્યો છે. પગારના મામલે સ્વિટ્ઝરલેન્ડનું ઝ્યુરિચ શહેર 8,363 ડોલર (લગભગ 8,05,200 રૂપિયા) ની માસિક આવક સાથે દુનિયામાં પહેલા નંબરે છે.