Dream11ની પેરન્ટ કંપની લઈ આવી Dream Money એપ, રોજના 10 રૂપિયામાં ખરીદો સોનું, FDનો પણ વિકલ્પ

Dream11ની પેરન્ટ કંપની Dream Sportsએ તેની નવી પહેલ Dream Money એપ લોન્ચ કરી છે, જે હજુ ડેવલપમેન્ટ ફેઝમાં છે અને તેનું પાયલટ ટેસ્ટિંગ ચાલી રહ્યું છે. આ એપ યૂઝર્સને ડિજિટલ ગોલ્ડમાં રોકાણ, ફિક્સ્ડ ડિપોઝિટ (FD) અને ખર્ચનું મેનેજમેન્ટ કરવાની સુવિધા આપે છે. કંપનીનો ઉદ્દેશ્ય આ એપ દ્વારા તેની સેવાઓમાં વિવિધતા લાવવાનો છે.

ઓનલાઈન ગેમિંગ બિલ 2025ની અસર

‘પ્રમોશન એન્ડ રેગ્યુલેશન ઓફ ઓનલાઈન ગેમિંગ બિલ, 2025'ને રાષ્ટ્રપતિ દ્રૌપદી મુર્મુએ 21 ઓગસ્ટ 2025ના રોજ મંજૂરી આપી હતી. આ બિલ લોકસભા અને રાજ્યસભામાંથી પસાર થયા બાદ અમલમાં આવ્યું છે. આ નવા કાયદાએ ઓનલાઈન રિયલ મની ગેમ્સ પર પ્રતિબંધ મૂક્યો છે, જેના કારણે Dream Sportsએ Dream11 પર તમામ પેઈડ કોન્ટેસ્ટ બંધ કરી દીધા છે. હવે Dream11 માત્ર ફ્રી ઓનલાઈન સોશિયલ ગેમ્સ પર ફોકસ કરશે, જે આ બિલના નિયમોને પ્રોત્સાહન આપે છે.

10 રૂપિયામાં સોનું, 1000 રૂપિયામાં FD

Dream Money એપ યૂઝર્સને રોજના 10 રૂપિયાથી શરૂ કરીને ડિજિટલ ગોલ્ડમાં રોકાણ કરવાની સુવિધા આપે છે. આ માટે કંપનીએ ડિજિટલ ગોલ્ડ ટ્રેડિંગ પ્લેટફોર્મ Augmont સાથે ભાગીદારી કરી છે. આ ઉપરાંત, એપ 1000 રૂપિયાથી શરૂ થતી FDની સુવિધા પણ આપે છે, જેમાં બેંક ખાતાની જરૂર નથી. યૂઝર્સ કોઈપણ સમયે પોતાના પૈસા ઉપાડી શકે છે. આ FD સુવિધા સૂર્યોદય સ્મોલ ફાઈનાન્સ બેંક, શિવાલિક સ્મોલ ફાઈનાન્સ બેંક, સ્લાઈસ સ્મોલ ફાઈનાન્સ બેંક અને શ્રીરામ ફાઈનાન્સ જેવી નોન-બેંકિંગ ફાઈનાન્સિયલ કંપનીઓ દ્વારા ઉપલબ્ધ કરાવવામાં આવે છે.

ફિનટેક અને AI સાથે ભાગીદારી

Dream Moneyએ ફિનટેક સ્ટાર્ટઅપ Upswing સાથે ભાગીદારી કરી છે, જે ઓપન ફાઈનાન્સ-એઝ-એ-સર્વિસ પ્લેટફોર્મ પૂરું પાડે છે. આ ઉપરાંત, SEBI રજિસ્ટર્ડ AI ઈન્વેસ્ટમેન્ટ એડવાઈઝર Sigfinn સાથેની ભાગીદારી યૂઝર્સને બેંક ખાતા, મ્યુચ્યુઅલ ફંડ, સ્ટોક અને ETF જેવા એસેટ્સને લિંક કરીને ખર્ચ, આવક અને રોકાણને એક જ જગ્યાએ ટ્રેક કરવામાં મદદ કરશે.