વૈશ્વિક બજારમાં બિઝનેસ અને મેન્યુફેક્ચરિંગ સેક્ટરમાં ચીનનો દબદબો કેમ વધી રહ્યો છે, તેનું એક મોટું અને સત્તાવાર કારણ સામે આવ્યું છે. આર્થિક સહયોગ અને વિકાસ સંગઠન (OECD) ના એક લેટેસ્ટ રિપોર્ટ અનુસાર, વર્ષ 2005 થી 2024 ની વચ્ચે ભારતીય કંપનીઓને ચીની કંપનીઓની સરખામણીમાં ખૂબ જ ઓછી સરકારી આર્થિક મદદ પ્રાપ્ત થઈ છે.
ચીની કંપનીઓની સરખામણીમાં ભારતીય કંપનીઓને મળી ખૂબ ઓછી સરકારી મદદ, OECD રિપોર્ટમાં મોટો ખુલાસો
ચીની કંપનીઓની તુલનામાં ભારતીય અને અન્ય દેશોની કંપનીઓને કેટલી સરકારી મદદ મળી? આર્થિક વિકાસ સંગઠન (OECD) ના લેટેસ્ટ રિપોર્ટમાં ચોંકાવનારા આંકડા સામે આવ્યા છે. જાણો વિગતવાર.
MoneyControl Newsઅપડેટેડ Jun 07, 2026 પર 4:24 PM
ચીની કંપનીઓને મળી 3 થી 8 ગણી વધુ આર્થિક મદદ
ઓઇસીડી મેજિક ડેટાબેઝ ઓફ ઇન્ડસ્ટ્રીયલ સબસિડીઝના આકલનમાં એ બાબત સામે આવી છે કે 2005 થી 2024 વચ્ચેના સમયગાળામાં ચીની કંપનીઓને અન્ય ઓઇસીડી દેશોની કંપનીઓની તુલનામાં સરેરાશ 3 થી 8 ગણી વધારે સરકારી મદદ મળી છે. નોંધનીય છે કે, બ્રાઝિલ, ભારત અને ઇન્ડોનેશિયા જેવા નોન-ઓઇસીડી દેશોની કંપનીઓને મળેલી મદદની સરખામણીમાં પણ ચીનને મળેલી સહાય અનેક ગણી વધારે હતી.
OECD મુખ્યત્વે 38 વિકસિત અર્થવ્યવસ્થાઓનું બનેલું એક સંગઠન છે, જેમાં અમેરિકા, બ્રિટન, કેનેડા, જર્મની, ફ્રાન્સ અને જાપાન જેવા દેશો સામેલ છે.
કઈ રીતે કરવામાં આવ્યું આ આકલન?
આ રિપોર્ટમાં 2005-2024 ના સમયગાળા દરમિયાન 15 મુખ્ય સેક્ટરમાં વિશ્વની 525 સૌથી મોટી મેન્યુફેક્ચરિંગ કંપનીઓનો ડેટા લેવામાં આવ્યો છે. જેમાં કંપનીઓને મુખ્ય ત્રણ રીતે કેટલી મદદ મળી તેનું આકલન કરાયું હતું.
સરકાર દ્વારા અપાતી સબસિડી
ઇન્કમ ટેક્સમાં મળતી છૂટછાટ
બજાર દર કરતાં ઘણા ઓછા વ્યાજે મળતી લોન
ચીનની 60 ટકા વૈશ્વિક હિસ્સેદારી પાછળ સરકારી ટેકો
રિપોર્ટના ચોંકાવનારા આંકડાઓ દર્શાવે છે કે 2005 થી 2023 વચ્ચે વિકાસ કરનારી કંપનીઓની વૈશ્વિક માર્કેટ હિસ્સેદારીમાં જે 22 ટકાનો વધારો થયો છે, તેની પાછળ તેમને મળેલી સબસિડી મુખ્ય કારણ છે. ચીની કંપનીઓના કિસ્સામાં તો આ બાબત વધારે સ્પષ્ટ થાય છે. તેમની ગ્લોબલ માર્કેટ હિસ્સેદારીમાં થયેલા લગભગ 60 ટકા જેટલા વધારા પાછળ સીધી રીતે ત્યાંની સરકાર દ્વારા અપાયેલી મદદ જ જવાબદાર છે.
વૈશ્વિક બજારોમાં પારદર્શિતા અને ભરોસો ઘટ્યો
વિશ્વ વ્યાપાર સંગઠનના નિયમો મુજબ દેશોએ સબસિડીની માહિતી આપવી પડે છે. પરંતુ આ રિપોર્ટ જણાવે છે કે સબસિડીની માહિતી ન આપનારા WTO સભ્યોની સંખ્યા વર્ષ 1995 માં 26 હતી, જે વર્ષ 2025 માં વધીને 117 થઈ ગઈ છે. એટલે કે આ આંકડો 23 ટકાથી ઉછળીને 70 ટકા પર પહોંચી ગયો છે, જેનાથી ગ્લોબલ માર્કેટમાં ભરોસાનું સ્તર ઘટ્યું છે.
મજબૂત પ્લેયર તરીકે ઊભું છે ભારત
ભારતની વાત કરીએ તો, સરકારી સબસિડીના મામલે ભલે આપણે ચીનથી ઘણા પાછળ હોઈએ, પરંતુ આજે ભારતીય ઉદ્યોગો પોતાની તાકાત બતાવી રહ્યા છે. ભારત અત્યારે સ્ટીલ, સિમેન્ટ, ફર્ટિલાઇઝર, હેવી મશીનરી અને ગ્લાસ તથા સિરામિક જેવા અનેક મહત્વના સેક્ટરોમાં વિશ્વના મુખ્ય ખેલાડી તરીકે પોતાનું સ્થાન જમાવી ચૂક્યું છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.