UPI માટે માર્ચ મહિનો રહ્યો ઐતિહાસિક, પરંતુ સરકારનો આ ટાર્ગેટ ના થયો પૂર્ણ

નાણાકીય વર્ષ 2025માં યુનિફાઈડ પેમેન્ટ્સ ઈન્ટરફેસ (UPI) દ્વારા થયેલા લેન-દેનમાં 41 ટકાથી વધુનો વધારો નોંધાયો છે. જોકે, આ ઝડપી વૃદ્ધિ છતાં સરકારે નિર્ધારિત કરેલું લક્ષ્ય હાંસલ થઈ શક્યું નથી અને તેમાંથી લગભગ 7.5 ટકાની ખામી રહી ગઈ. નેશનલ પેમેન્ટ્સ કોર્પોરેશન ઓફ ઈન્ડિયા (એનપીસીઆઈ)ના આંકડા પ્રમાણે, સરકારે નાણાકીય વર્ષ 2025 માટે 20,000 કરોડ લેન-દેનનું લક્ષ્ય રાખ્યું હતું, પરંતુ આખા વર્ષ દરમિયાન UPI દ્વારા 18,500 કરોડ લેન-દેન જ થયા. નાણાકીય વર્ષ 2024માં આ આંકડો 13,100 કરોડ હતો. આ પછી સરકારે 1,500 કરોડ રૂપિયાની UPI સબસિડી જાહેર કરીને 20,000 કરોડ ટ્રાન્ઝેક્શનનું લક્ષ્ય નક્કી કર્યું હતું.

FY25માં UPI દ્વારા કેટલાં રૂપિયાનું લેન-દેન થયું?

નાણાકીય વર્ષ 2025માં UPI દ્વારા લેન-દેન વાર્ષિક ધોરણે 41 ટકાથી વધુ વધીને રેકોર્ડ 18,500 કરોડ ટ્રાન્ઝેક્શન સુધી પહોંચ્યું. આ ટ્રાન્ઝેક્શન્સમાં કુલ 260 લાખ કરોડ રૂપિયાનું લેન-દેન થયું, જે નાણાકીય વર્ષ 2024માં થયેલા 200 લાખ કરોડ રૂપિયાના લેન-દેન કરતાં 30 ટકા વધારે છે. આનો અર્થ એ થયો કે નાણાકીય વર્ષ 2025માં UPI ટ્રાન્ઝેક્શનની સંખ્યા 41 ટકા વધી, જ્યારે તેની કિંમતમાં 30 ટકાનો વધારો થયો.

માર્ચે રચ્યો ઇતિહાસ

ગયા મહિના માર્ચે UPI માટે ઐતિહાસિક સિદ્ધિ હાંસલ કરી, જ્યારે પ્રથમ વખત દૈનિક લેન-દેનની કિંમત 1 લાખ કરોડ રૂપિયાને પાર કરી ગઈ. 1 માર્ચના રોજ UPI દ્વારા 1,01,628 કરોડ રૂપિયાનું લેન-દેન નોંધાયું. UPI હાલમાં સૌથી ઝડપથી વિકસતું પેમેન્ટ પ્લેટફોર્મ છે અને તમામ ડિજિટલ પેમેન્ટ્સમાં તેનો હિસ્સો લગભગ 85 ટકા છે. એનપીસીઆઈની વેબસાઈટ મુજબ, વર્ષ 2016થી અત્યાર સુધી 40 કંપનીઓને થર્ડ-પાર્ટી એપ્લિકેશન પ્રોવાઈડર (TPAP)ની મંજૂરી મળી ચૂકી છે. એકલા વર્ષ 2024માં જ 20 કંપનીઓને એનપીસીઆઈ તરફથી આ મંજૂરી મળી. ગ્રાહકોને UPI સેવાઓ પૂરી પાડવા માટે આ મંજૂરી આવશ્યક હોય છે.

આ પણ વાંચો- 1લી એપ્રિલથી આ મોબાઇલ નંબરો પર બંધ થઈ જશે UPI! તમારા Google Pay, PhonePe અને Paytmને પણ થશે અસર