Metaએ લોન્ચ કર્યા 2 નવા AI મોડલ્સ: વોટ્સએપ અને ઇન્સ્ટાગ્રામમાં મળશે સપોર્ટ, Google અને OpenAIની વધી ચિંતા

Metaના સીઈઓ માર્ક ઝકરબર્ગે આ અંગે મોટી જાહેરાત કરી છે. તેમણે જણાવ્યું કે કંપનીએ Llama 4 Scout અને Llama 4 Maverick નામના બે નવા AI મોડલ્સ લોન્ચ કર્યા છે. આ ઉપરાંત, નજીકના ભવિષ્યમાં બે અન્ય AI મોડલ્સ પણ રજૂ કરવાની યોજના છે. ઝકરબર્ગે સોશિયલ મીડિયા પર એક વીડિયો શેર કરીને Llama 4 વિશે માહિતી આપી અને કહ્યું કે આ મોડલ્સ Googleના Gemini અને OpenAIના ChatGPT 4oને સીધી ટક્કર આપશે.

Metaનું Llama મોડલ એક મલ્ટીમોડલ AI છે, જે ટેક્સ્ટ, વીડિયો, ઇમેજ અને ઓડિયો ડેટાને પ્રોસેસ કરવામાં સક્ષમ છે. કંપનીના જણાવ્યા અનુસાર, Llama 4 Scout અને Llama 4 Maverick અત્યાર સુધીના સૌથી અદ્યતન મોડલ્સ છે, જે મલ્ટીમોડેલિટીમાં શ્રેષ્ઠ પ્રદર્શન આપે છે. આ મોડલ્સ દ્વારા કરોડો યુઝર્સને રોજિંદા કામકાજમાં મોટી સરળતા મળશે.

નવા AI મોડલ્સ કેવી રીતે ડાઉનલોડ કરશો?

જો તમે Llama 4 Scout અને Llama 4 Maverickનો ઉપયોગ કરવા માગો છો, તો તમે તેને Llamaની ઓફિશિયલ વેબસાઈટ અથવા Hugging Face પ્લેટફોર્મ પરથી ડાઉનલોડ કરી શકો છો. આ ઉપરાંત, Meta આ મોડલ્સનો સપોર્ટ વોટ્સએપ, મેસેન્જર અને ઇન્સ્ટાગ્રામમાં પણ ઉમેરશે. આનો અર્થ એ થયો કે હવે યુઝર્સને તેમના સોશિયલ મીડિયા પ્લેટફોર્મ્સ પર નવો અને સ્માર્ટ એક્સપિરિયન્સ મળશે. કંપનીએ Llama 4 Behemoth મોડલનું પણ પ્રીવ્યૂ રજૂ કર્યું છે, જે ભવિષ્યમાં લોન્ચ થશે.

મોડલ્સની ખાસિયતો

Llama 4 Scout: આ એક નાનું અને કાર્યક્ષમ AI મોડલ છે, જે 17 બિલિયન પેરામીટર્સ અને 16 એક્સપર્ટ્સ સાથે આવે છે. તે 10 મિલિયન ટોકનની કોન્ટેક્સ્ટ વિન્ડો ઓફર કરે છે, જે યુઝર્સ માટે લાંબા ડેટાને પ્રોસેસ કરવામાં મદદરૂપ થશે.

Llama 4 Maverick: આ મોડલમાં 17 બિલિયન પેરામીટર્સ સાથે 128 એક્સપર્ટ્સનો સમાવેશ થાય છે, જે તેને વધુ શક્તિશાળી અને વિવિધ કાર્યો માટે યોગ્ય બનાવે છે.