શેરબજારમાં સુસ્તી પણ ક્રિપ્ટો માર્કેટમાં તેજીનું તોફાન, BitCoin સહિતની કરન્સીમાં રોકાણકારો માલામાલ

Crypto Market : ઈરાન, અમેરિકા અને ઈઝરાયેલ વચ્ચે ચાલી રહેલા યુદ્ધ અને રાજકીય અનિશ્ચિતતાની સીધી અસર વિશ્વભરના શેરબજારો પર જોવા મળી રહી છે. એકતરફ સ્ટોક માર્કેટમાં ઘટાડાનો માહોલ છે, તો બીજી તરફ ક્રિપ્ટો માર્કેટમાં રોકાણકારો પર પૈસાનો વરસાદ થઈ રહ્યો છે. માર્કેટ કેપની દ્રષ્ટિએ ટોપ-10 ક્રિપ્ટોકરન્સીમાંથી મોટાભાગની કરન્સી અત્યારે ગ્રીન ઝોનમાં ટ્રેડ થઈ રહી છે.

BitCoin માં પાંચ ટકાની તેજી

ક્રિપ્ટો માર્કેટના રાજા ગણાતા બીટકોઈનની વાત કરીએ તો, છેલ્લા એક અઠવાડિયામાં તેમાં 5% થી વધુનો ઉછાળો જોવા મળ્યો છે. આજે બપોરે 12:45 વાગ્યા સુધીમાં બીટકોઈન 2.70% વધીને $77,986.89 (આશરે ₹73.18 લાખ) પર પહોંચી ગયો છે. માત્ર બીટકોઈન જ નહીં, પણ બીજી સૌથી મોટી ક્રિપ્ટોકરન્સી ઇથેરિયમમાં પણ 3% થી વધુની તેજી નોંધાઈ છે.

શેરબજાર વિરુદ્ધ ક્રિપ્ટો માર્કેટ

જ્યારે ઘરેલું શેરબજારમાં નિફ્ટી એક અઠવાડિયામાં અડધા ટકા જેટલો પણ વધી શક્યો નથી, ત્યારે ટોપ-10 ક્રિપ્ટોમાં 6% સુધીનો જંગી વધારો જોવા મળ્યો છે. સેન્સેક્સના 30 માંથી માત્ર 10 શેર જ અત્યારે વધારા સાથે ટ્રેડ કરી રહ્યા છે, જ્યારે બાકીના શેરોમાં 11% સુધીનો કડાકો જોવા મળ્યો છે. તેની સરખામણીએ ક્રિપ્ટો માર્કેટમાં આજે માત્ર બે જ કરન્સી લાલ નિશાનમાં છે, જેમાં ટેધર અને હાઈપરલિક્વિડમાં મામૂલી ઘટાડો છે.

વૈશ્વિક માર્કેટ કેપમાં મોટો ઉછાળો

છેલ્લા 24 કલાકમાં સમગ્ર ક્રિપ્ટો માર્કેટના વૈશ્વિક માર્કેટ કેપમાં 2.17% નો વધારો થયો છે, જે હવે $2.61 લાખ કરોડ પર પહોંચી ગયું છે. ક્રિપ્ટોકરન્સીના લેન-દેન એટલે કે ટ્રેડિંગ વોલ્યુમમાં પણ 1.24% નો વધારો થયો છે. છેલ્લા એક દિવસમાં $145 અબજના ક્રિપ્ટો સોદા થયા છે.