Crude Oil Price: કાચા તેલના ભાવ $95ની નજીક સ્થિર, અમેરિકા-ઈરાન વચ્ચેની શાંતિ મંત્રણા પર બજારની નજર

Crude Oil Price: આંતરરાષ્ટ્રીય બજારમાં છેલ્લા સેશનમાં આવેલા મોટા ઘટાડા બાદ હવે કાચા તેલની કિંમતોમાં કોઈ મોટો ફેરફાર જોવા મળ્યો નથી. કાચા તેલના ભાવ અત્યારે $95 પ્રતિ બેરલની નજીક ટ્રેડ કરી રહ્યા છે. બજારની નજર હાલમાં અમેરિકા અને ઈરાન વચ્ચે ચાલી રહેલી શાંતિ મંત્રણા પર ટકેલી છે. મિડલ ઈસ્ટમાં ચાલી રહેલા તણાવ અને સુરક્ષાને લઈને જે ચિંતાઓ હતી, તેમાં અમેરિકા-ઈરાનની વાતચીતથી રાહતના સંકેતો મળ્યા છે.

કાચા તેલના લેટેસ્ટ ભાવ

ગત સેશનમાં 2.84% તૂટ્યા બાદ બ્રેન્ટ ક્રૂડ ફ્યુચર્સ વધુ 0.22% ઘટીને $95.24 પ્રતિ બેરલ પર આવી ગયું છે. WTI ક્રૂડ ગુરુવારે 3.1% ના કડાકા બાદ WTI ક્રૂડ વધુ 0.11% ના સામાન્ય ઘટાડા સાથે $92.94 પ્રતિ બેરલ પર ટ્રેડ થઈ રહ્યું છે.

ટ્રમ્પની એન્ટ્રી અને ઈરાન સાથેની મંત્રણા

ક્રૂડ ઓઇલના ભાવમાં આવેલો આ ઘટાડો અમેરિકી રાષ્ટ્રપતિ ડોનાલ્ડ ટ્રમ્પના તે નિવેદન બાદ આવ્યો છે, જેમાં તેમણે સ્પષ્ટ સંકેત આપ્યો છે કે ઈરાન સાથેની વાતચીત સકારાત્મક દિશામાં આગળ વધી રહી છે. આનાથી એવી આશા જાગી છે કે જો કોઈ મોટી સમજૂતી થશે તો સ્ટ્રેટ ઓફ હોર્મુઝ દ્વારા થતા તેલના સપ્લાયમાં આવતી અડચણો દૂર થશે. આ રસ્તો દુનિયાના સૌથી મહત્વના ઓઇલ ટ્રાન્ઝિટ રૂટમાંનો એક છે.

હિઝબુલ્લાહનો વિરોધ અને ટ્રમ્પનું નિવેદન

રાષ્ટ્રપતિ ટ્રમ્પે તેહરાન સાથેની વાતચીત અંગે પોઝિટિવ વલણ અપનાવ્યું છે. જોકે, ઈરાન સમર્થિત સંગઠન હિઝબુલ્લાહે ઈઝરાયેલ અને લેબનોન વચ્ચેના અમેરિકન યુદ્ધવિરામપ્રસ્તાવને ફગાવી દેતા થોડી અનિશ્ચિતતા જરૂર ઊભી થઈ છે. આમ છતાં, વ્હાઇટ હાઉસમાં પત્રકારો સાથે વાત કરતા ટ્રમ્પે હિઝબુલ્લાહના આ નકારાત્મક વલણને બહુ મહત્વ આપ્યું ન હતું. તેમણે કહ્યું કે સંગઠને દુશ્મની ખતમ કરવા અંગે વાતચીત કરવા માટે સંપર્ક કર્યો હતો.