સોના-ચાંદીના ભાવમાં આગ ઝરતી તેજી: ભાવ પહોંચ્યા રેકોર્ડ ઊંચાઈએ, ખરીદી કરતાં પહેલાં જાણો આજના નવા રેટ

Gold and silver prices: આજે, ગુરુવાર, 18 ડિસેમ્બરના રોજ, સોના અને ચાંદીની કિંમતોમાં ફરી એકવાર ઉછાળો જોવા મળ્યો છે, જેના કારણે રોકાણકારો અને ખરીદદારોની નજર બજાર પર મંડરાયેલી છે. સ્થાનિક અને આંતરરાષ્ટ્રીય બજારોમાં સતત વધી રહેલી માંગને કારણે કિંમતી ધાતુઓના ભાવ આસમાને પહોંચી ગયા છે. અમેરિકી ડોલર ઈન્ડેક્સમાં ઘટાડો થવાથી આંતરરાષ્ટ્રીય ખરીદદારો માટે સોનાની ખરીદી વધુ આકર્ષક બની છે, જે ભાવવધારા પાછળનું મુખ્ય કારણ માનવામાં આવે છે.

દેશના મુખ્ય શહેરોમાં સોનાના ભાવ

આજે સવારે દેશની રાજધાની દિલ્હીમાં સોનાના ભાવ નવી ઊંચાઈએ પહોંચ્યા હતા. દિલ્હીમાં 24 કેરેટ સોનાનો ભાવ 10 ગ્રામ દીઠ ₹1,34,670 નોંધાયો હતો, જ્યારે 22 કેરેટ સોનાની કિંમત ₹1,23,460 રહી હતી. આર્થિક રાજધાની મુંબઈની વાત કરીએ તો, ત્યાં 24 કેરેટ સોનાનો ભાવ ₹1,34,520 અને 22 કેરેટ સોનાનો ભાવ ₹1,23,310 પ્રતિ 10 ગ્રામ રહ્યો હતો.

અમદાવાદ, ચેન્નઈ, કોલકાતા, હૈદરાબાદ, પુણે અને બેંગલુરુ જેવા અન્ય મોટા શહેરોમાં પણ સોનાના ભાવમાં લગભગ સમાનતા જોવા મળી હતી. અમદાવાદ અને ભોપાલમાં 22 કેરેટ સોનાનો ભાવ ₹1,23,360 અને 24 કેરેટ સોનાનો ભાવ ₹1,34,570 નોંધાયો હતો. જ્યારે જયપુર, લખનઉ અને ચંદીગઢમાં ભાવ દિલ્હીના સ્તર પર એટલે કે 22 કેરેટ માટે ₹1,23,460 અને 24 કેરેટ માટે ₹1,34,670 રહ્યા હતા.

ચાંદીના ભાવમાં પણ રેકોર્ડબ્રેક ઉછાળો

સોનાની સાથે સાથે ચાંદી પણ રોકાણકારોને આકર્ષી રહી છે અને તેના ભાવમાં પણ જબરદસ્ત તેજી જોવા મળી છે. આજે ચાંદીનો ભાવ પ્રતિ કિલોગ્રામ ₹2,08,100 પર પહોંચી ગયો છે. આંતરરાષ્ટ્રીય બજારમાં ચાંદીનો હાજર ભાવ 66.52 ડોલર પ્રતિ ઔંસના નવા રેકોર્ડ સ્તરે પહોંચ્યો છે.

બજારના નિષ્ણાતોના મતે, ચાંદીના ભાવમાં આ ઉછાળા પાછળ પુરવઠામાં ઘટાડો, સલામત રોકાણ તરીકે ચાંદીની વધતી માંગ, સિલ્વર ETFમાં રોકાણનો પ્રવાહ અને યુએસ ફેડરલ રિઝર્વ દ્વારા વ્યાજદરમાં ઘટાડાની અપેક્ષા જેવા પરિબળો જવાબદાર છે. આ ઉપરાંત, ચીન 2026થી ચાંદીની નિકાસ પર પ્રતિબંધ મૂકી શકે છે તેવા અહેવાલોએ પણ બજારમાં તેજીને વધુ વેગ આપ્યો છે. નોંધનીય છે કે આ વર્ષે ચાંદીની કિંમતોમાં અત્યાર સુધીમાં 127 ટકાનો જંગી વધારો જોવા મળ્યો છે.