સ્ટ્રેટ ઓફ હોર્મુઝ 3-4 અઠવાડિયામાં નહીં ખુલે તો દુનિયામાં આવશે ભયંકર ક્રાઈસિસ, ક્રૂડ ઓઈલ 150 ડોલરને પાર થઈ શકે

Strait of Hormuz crisis: અમેરિકા, ઇઝરાયેલ અને ઈરાન વચ્ચે ચાલી રહેલા તણાવને કારણે દુનિયાની સામે એક મોટું આર્થિક સંકટ ઊભું થઈ ગયું છે. આ યુદ્ધના કારણે ‘સ્ટ્રેટ ઓફ હોર્મુઝ' (Strait of Hormuz) નો રૂટ લગભગ બંધ થઈ ગયો છે. જો આગામી 3 થી 4 અઠવાડિયામાં આ રસ્તો ફરીથી નહીં ખુલે, તો ગ્લોબલ ઓઈલ માર્કેટ અને અર્થવ્યવસ્થાને બહુ મોટો ઝટકો લાગી શકે છે.

સ્ટ્રેટ ઓફ હોર્મુઝ કેમ મહત્ત્વપૂર્ણ છે?

તમને જણાવી દઈએ કે દુનિયામાં સપ્લાય થતા કુલ ઓઈલ અને ગેસમાંથી લગભગ 20 ટકા હિસ્સો આ સ્ટ્રેટ ઓફ હોર્મુઝના રસ્તેથી જ પસાર થાય છે. પરંતુ ઈરાને અમેરિકા અને ઇઝરાયેલના હુમલાનો જવાબ આપવા માટે ખાડી દેશોના ઓઈલ ઈન્ફ્રાસ્ટ્રક્ચર અને ટેન્કર્સ પર નિશાન સાધવાનું શરૂ કર્યું છે. આ ડરના કારણે હવે મોટાભાગના જહાજો આ રૂટનો ઉપયોગ કરવાનું ટાળી રહ્યા છે, જેની સીધી અસર ક્રૂડ ઓઈલ અને ગેસની સપ્લાય પર પડી છે.

માર્કેટમાં અનિશ્ચિતતાનો માહોલ

એલેથિયા કેપિટલ (Aletheia Capital)ના ગ્લોબલ સ્ટ્રેટેજિસ્ટ જોનાથન વિલમોટે 14 માર્ચના રોજ મનીકંટ્રોલના એક કાર્યક્રમમાં ચેતવણી આપતા કહ્યું હતું કે, "ગ્લોબલ માર્કેટને બચાવવા માટે આ રસ્તો 3-4 અઠવાડિયામાં ખુલી જવો ખૂબ જ જરૂરી છે." તેમણે વધુમાં જણાવ્યું કે હાલ માર્કેટમાં નબળાઈ જોવા મળી શકે છે. ભલે આગામી દિવસોમાં અમેરિકાની જીત થાય, તો પણ જ્યાં સુધી આ રસ્તો ફરીથી શરૂ કરવાનો કોઈ નક્કર પ્લાન નહીં બને ત્યાં સુધી માર્કેટમાં કોઈ મોટો ફાયદો જોવા નહીં મળે.

ક્રૂડ ઓઈલ 150 ડોલર સુધી પહોંચી શકે છે

એનાલિસ્ટ્સ માની રહ્યા છે કે સપ્લાય ચેન ખોરવાઈ જવાને કારણે ક્રૂડ ઓઈલના ભાવ સતત વધી રહ્યા છે. નીચે મુજબની પરિસ્થિતિનું નિર્માણ થઈ શકે છે. હાલમાં બ્રેન્ટ ક્રૂડનો ભાવ 100 ડોલર પ્રતિ બેરલની આસપાસ ચાલી રહ્યો છે. જો રસ્તો નહીં ખુલે તો આ આંકડો 150 ડોલર સુધી પહોંચવાની આશંકા છે.