‘અમેરિકાએ જે કરવું હોય તે કરે, અમે કોઈનાથી ડરતા નથી', 100% ટેરિફની ધમકી પર ભારતનો રોકડો જવાબ

US 100% Tariff on India: ડોનાલ્ડ ટ્રમ્પના નેતૃત્વમાં અમેરિકાએ ફરી એકવાર ભારત પર દબાણ બનાવવાનો પ્રયાસ કર્યો છે. રશિયા પાસેથી કાચું તેલ ખરીદતા દેશો પર 100 ટકા ટેરિફ લગાવવા માટે અમેરિકા નવો કાયદો લાવી રહ્યું છે. પરંતુ, અમેરિકાની આ ખુલ્લી ધમકી સામે ભારતે જડબાતોડ જવાબ આપ્યો છે. ભારતે દુનિયાને સ્પષ્ટ સંદેશ આપ્યો છે કે દેશની ઊર્જા સુરક્ષા સાથે કોઈ બાંધછોડ કરવામાં આવશે નહીં.

ભારત કોઈ દબાણ સામે ઝૂકશે નહીં

ભારતીય વિદેશ મંત્રાલયના પ્રવક્તા રણધીર જયસ્વાલે અમેરિકાની આ ધમકી પર દેશનું વલણ એકદમ સ્પષ્ટ કરી દીધું છે. તેમણે કહ્યું કે, ભારત સરકાર પોતાના 140 કરોડ નાગરિકોના હિતોને ધ્યાનમાં રાખીને જ ઊર્જા સંબંધિત નિર્ણયો લે છે. અમેરિકા ભલે ગમે તેટલા કડક નિયમો લાવે કે 100 ટકા ટેરિફ લગાવે, ભારત રશિયા પાસેથી ઓઇલ ખરીદવાનું ચાલુ જ રાખશે. ભારત પોતાની ઓઇલ ખરીદીની નીતિમાં કોઈ પણ વિદેશી દબાણ હેઠળ ફેરફાર કરશે નહીં.

અમેરિકન સંસદમાં ‘લિન્ડસે ગ્રેહામ બિલ' પસાર

અમેરિકામાં રશિયા અને ઈરાન પર પ્રતિબંધો કડક કરવા માટે ‘લિન્ડસે ગ્રેહામ સેંક્શનિંગ રશિયા એન્ડ ઈરાન બિલ’ લાવવામાં આવ્યું છે. આ બિલ અમેરિકન સેનેટમાં 86-11ની જંગી બહુમતીથી પસાર થઈ ચૂક્યું છે. હવે ગુરુવારે તેને હાઉસ ઓફ રિપ્રેઝન્ટેટિવ્સમાં વોટિંગ માટે રજૂ કરવામાં આવશે. આ બિલનો મુખ્ય ટાર્ગેટ રશિયા પાસેથી સસ્તું તેલ ખરીદતા ભારત અને ચીન જેવા દેશો છે.

બિલમાં 10 દેશોના નામ સામેલ કરવાની માંગ

લેટેસ્ટ રિપોર્ટ્સ અનુસાર, અમેરિકી સાંસદો ઈચ્છી રહ્યા છે કે આ બિલમાં રશિયા પાસેથી ઓઇલ ખરીદતા ટોપ 10 દેશોના નામ સીધા લખવામાં આવે. આ લિસ્ટમાં ભારત, ચીન, તુર્કી, અઝરબૈજાન, હંગેરી, યુએઈ અને સિંગાપોર જેવા દેશોનો સમાવેશ થાય છે. કેટલાક સાંસદોએ ખાસ કરીને ભારતનું નામ અલગથી ઉમેરીને તેના પર સીધો 100 ટકા ટેરિફ લાદવાની ભલામણ કરી છે.