US-Iran Peace Deal: અમેરિકા અને ઈરાન વચ્ચે ઐતિહાસિક શાંતિ કરાર, કાચા તેલના ભાવમાં 5%નો કડાકો

US-Iran Peace Deal: સોમવારે કાચા તેલ (Crude Oil) ની કિંમતોમાં માર્ચ મહિના પછીનો સૌથી મોટો ઘટાડો જોવા મળ્યો છે. આ ઘટાડા પાછળનું મુખ્ય કારણ અમેરિકા અને ઈરાન વચ્ચે ફાઈનલ થયેલી શાંતિ ડીલ (US-Iran Peace Deal) છે. અમેરિકન રાષ્ટ્રપતિ ડોનાલ્ડ ટ્રમ્પે જાહેરાત કરી છે કે બંને દેશો યુદ્ધ ખતમ કરવા અને હોર્મુઝ સ્ટ્રેટ (Strait of Hormuz) માંથી વેપાર અને જહાજોની અવરજવર ફરી શરૂ કરવા માટે એક પ્રાથમિક કરાર પર પહોંચી ગયા છે.

કાચા તેલના ભાવમાં મોટો કડાકો

આ ઐતિહાસિક જાહેરાત બાદ ગ્લોબલ માર્કેટમાં ક્રૂડ ઓઇલના ભાવ ગગડી ગયા છે. બ્રેન્ટ ક્રૂડ ફ્યુચર્સની કિંમત 4.2 ડોલર એટલે કે લગભગ 5% ઘટીને 83.07 ડોલર પ્રતિ બેરલ પર આવી ગઈ છે. બીજી તરફ U.S. વેસ્ટ ટેક્સાસ ઈન્ટરમીડિયેટ (WTI) પણ 4.7 ડોલર અથવા 5.6% ઘટીને 80.12 ડોલર પ્રતિ બેરલ થઈ ગયું છે. અગાઉ શુક્રવારે પણ આ બંને કોન્ટ્રાક્ટમાં 3% થી વધુનો ઘટાડો નોંધાયો હતો.

પાકિસ્તાને ભજવી મધ્યસ્થીની ભૂમિકા

રોયટર્સના અહેવાલ મુજબ, ઈરાનના ડેપ્યુટી વિદેશ મંત્રી કાઝેમ ગરીબાબાદીએ જણાવ્યું છે કે 60 દિવસના સીઝફાયર (યુદ્ધવિરામ) દરમિયાન એક મોટા અને વ્યાપક કરાર પર ચર્ચા કરવામાં આવશે. આ મામલે પાકિસ્તાનના વડાપ્રધાન શાહબાઝ શરીફે કહ્યું છે કે આગામી શુક્રવારે સ્વિટ્ઝર્લેન્ડમાં આ ડીલ પર સત્તાવાર રીતે સહી કરવામાં આવશે. એવું કહેવામાં આવી રહ્યું છે કે અમેરિકા અને ઈરાન વચ્ચે સમાધાન કરાવવામાં પાકિસ્તાને મહત્વની મધ્યસ્થીની ભૂમિકા ભજવી છે.

ઈરાની બંદરો પરથી અમેરિકી નાકાબંધી હટશે

રવિવારે રાષ્ટ્રપતિ ટ્રમ્પે સ્પષ્ટ કર્યું હતું કે હોર્મુઝ સ્ટ્રેટ હવે ટોલ-ફ્રી (કોઈપણ ચાર્જ વગર) ખુલ્લો રહેશે. આ ઉપરાંત, ઈરાની બંદરો પર અમેરિકન નૌકાદળ દ્વારા લગાવવામાં આવેલી કડક નાકાબંધી પણ હટાવી લેવામાં આવશે. ઈરાનની અર્ધ-સરકારી મેહર ન્યૂઝ એજન્સીના જણાવ્યા અનુસાર, આ ડીલના ડ્રાફ્ટમાં 30 દિવસની અંદર હોર્મુઝ સ્ટ્રેટને સંપૂર્ણપણે ફરીથી ખોલવાની વાત કરવામાં આવી છે.