Ashwini Container Movers IPO Listing: દાવ ઉલટો પડ્યો, 3.52%ના પ્રીમિયમ પછી શેર લોઅર સર્કિટ પર, રોકાણકારો ચિંતામાં

Ashwini Container Movers IPO Listing: શેરબજારમાં આજે વધુ એક નવા IPOનું લિસ્ટિંગ થયું, પરંતુ રોકાણકારો માટે આ અનુભવ મિશ્ર રહ્યો. માલવાહક ક્ષેત્રે કાર્યરત 'અશ્વિની કન્ટેનર મુવર્સ' (Ashwini Container Movers) ના શેરનું આજે NSE SME પ્લેટફોર્મ પર પ્રીમિયમ ભાવે લિસ્ટિંગ થયું હતું. IPOમાં શેર 142ના ભાવે ફાળવવામાં આવ્યા હતા, જેની સામે શેર 147.00 પર લિસ્ટ થયો. આ લિસ્ટિંગ સાથે રોકાણકારોને શેર દીઠ 3.52%નો નફો મળ્યો હતો. જોકે, રોકાણકારોની આ ખુશી લાંબો સમય ટકી શકી નહીં અને થોડી જ વારમાં શેરમાં વેચવાલીનું દબાણ આવતા તે 139.65ની લોઅર સર્કિટ પર ગગડી ગયો. આમ, જે રોકાણકારો લિસ્ટિંગના નફામાં હતા, તે હવે 1.65%ની ખોટમાં આવી ગયા છે.

IPO દ્વારા એકત્રિત ફંડનો ઉપયોગ

અશ્વિની કન્ટેનર્સ મુવર્સનો 71.00 કરોડનો IPO 12 ડિસેમ્બરથી 16 ડિસેમ્બર સુધી રોકાણ માટે ખુલ્લો હતો. રોકાણકારો તરફથી તેને સારો પ્રતિસાદ મળ્યો હતો અને તે કુલ 1.70 ગણો ભરાયો હતો. જેમાં ક્વોલિફાઈડ ઈન્સ્ટિટ્યુશનલ બાયર્સ (QIB)નો હિસ્સો 1.31 ગણો, નોન-ઈન્સ્ટિટ્યુશનલ ઈન્વેસ્ટર્સ (NII)નો હિસ્સો 3.50 ગણો અને રિટેલ રોકાણકારોનો હિસ્સો 1.15 ગણો ભરાયો હતો. આ IPO હેઠળ 10ની ફેસ વેલ્યૂવાળા 50 લાખ નવા શેર જારી કરવામાં આવ્યા છે. કંપની આ ફંડમાંથી 42.50 કરોડનો ઉપયોગ દેવું ઘટાડવા, 8.07 કરોડનો ઉપયોગ નવા ટ્રક ખરીદવા અને બાકીની રકમનો ઉપયોગ સામાન્ય કોર્પોરેટ હેતુઓ માટે કરશે.

કંપનીની કામગીરી અને આર્થિક સ્થિતિ

એપ્રિલ 2012માં સ્થપાયેલી અશ્વિની કન્ટેનર મુવર્સ મુખ્યત્વે ગુજરાત અને મહારાષ્ટ્રમાં કાર્ગો ટ્રાન્સપોર્ટ સેવાઓ પૂરી પાડે છે. કંપની પાસે 20-ફૂટ અને 40-ફૂટની ક્ષમતાવાળા 300થી વધુ વાહનોનો કાફલો છે, જે ફેક્ટરીથી બંદર અને બંદરથી ફેક્ટરી સુધી માલસામાનની હેરફેર કરે છે. કંપનીની નાણાકીય સ્થિતિ પર નજર કરીએ તો, નાણાકીય વર્ષ 2023માં કંપનીએ 2.10 કરોડનો ચોખ્ખો નફો કર્યો હતો, જે 2024માં ઘટીને 1.38 કરોડ થયો હતો. જોકે, નાણાકીય વર્ષ 2025માં કંપનીના નફામાં જબરદસ્ત ઉછાળો આવ્યો અને તે 11.45 કરોડ પર પહોંચી ગયો. આ સમયગાળા દરમિયાન, કંપનીની કુલ આવક વાર્ષિક 11% થી વધુના દરે વધીને 96.06 કરોડ થઈ છે. ચાલુ નાણાકીય વર્ષ 2026ના પ્રથમ છ મહિના (એપ્રિલ-સપ્ટેમ્બર 2025)માં કંપનીએ 9.91 કરોડનો ચોખ્ખો નફો અને 55.86 કરોડની કુલ આવક મેળવી છે. સપ્ટેમ્બર 2025 સુધીમાં, કંપની પર કુલ 74.90 કરોડનું દેવું હતું, જ્યારે તેની પાસે 20.40 કરોડનું રિઝર્વ અને સરપ્લસ હતું.

આ પણ વાંચો- Buy Rating: Groww બનશે ભારતનું 'રોબિનહુડ'? જેફરીઝે આપી પહેલી 'Buy' રેટિંગ, શેરમાં 26% ઉછાળાનો અંદાજ

ડિસ્ક્લેમર: આ આર્ટિકલમાં આપવામાં આવેલી માહિતી ફક્ત જાણકારી માટે છે. શેરબજારમાં રોકાણ બજારના જોખમોને આધીન છે. કોઈપણ પ્રકારનું રોકાણ કરતા પહેલા હંમેશા નાણાકીય નિષ્ણાતની સલાહ લેવી જરૂરી છે. અહીં કોઈપણ વ્યક્તિને રોકાણ કરવાની સલાહ આપવામાં આવતી નથી.