PhonePe 1.5 બિલિયન ડોલરનો IPO લાવશે, ઓગસ્ટમાં DRHP કરી શકે છે ફાઇલ

ભારતની અગ્રણી ફિનટેક કંપની PhonePe ટૂંક સમયમાં 1.5 બિલિયન ડોલરનો ઇનિશિયલ પબ્લિક ઓફરિંગ (IPO) લાવવાની તૈયારી કરી રહી છે. અમેરિકન રિટેલ ચેઇન વોલમાર્ટ દ્વારા સમર્થિત આ ડિજિટલ પેમેન્ટ પ્લેટફોર્મ ઓગસ્ટની શરૂઆતમાં સેબી (SEBI) પાસે ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કરી શકે છે. રિપોર્ટ્સ અનુસાર, આ IPO પછી PhonePeની વેલ્યુએશન લગભગ 15 બિલિયન ડોલર સુધી પહોંચી શકે છે.

IPO મેનેજમેન્ટ માટે મોટી કંપનીઓ સાથે ટાઇ-અપ

PhonePe આ મહત્વપૂર્ણ IPOને મેનેજ કરવા માટે અગ્રણી ફાઇનાન્સિયલ ઇન્સ્ટિટ્યૂશન્સની મદદ લઈ રહી છે. કંપનીએ આ માટે કોટક મહિન્દ્રા કેપિટલ કંપની, જેપી મોર્ગન ચેઝ એન્ડ કંપની, સિટીગ્રુપ ઇન્ક, અને મોર્ગન સ્ટેનલી જેવી મોટી કંપનીઓ સાથે સંપર્ક કર્યો છે. નિષ્ણાતોનું કહેવું છે કે IPO અંગેની ચર્ચાઓ હજુ ચાલુ છે, અને PhonePeની યોજનાઓમાં ફેરફાર પણ થઈ શકે છે.

2023માં 12 બિલિયન ડોલરની વેલ્યુએશન

PhonePeની ગ્રોથ સ્ટોરી નોંધપાત્ર રહી છે. 2023માં રિબિટ કેપિટલ, ટાઇગર ગ્લોબલ મેનેજમેન્ટ, અને ટીવીએસ કેપિટલ ફંડ્સ પાસેથી 100 મિલિયન ડોલરનું ફંડિંગ મેળવ્યું હતું. આ ફંડિંગ પછી કંપનીની વેલ્યુએશન 12 બિલિયન ડોલર સુધી પહોંચી શકે છે. હવે આ આગામી IPO દ્વારા PhonePe પોતાની માર્કેટ પોઝિશનને વધુ મજબૂત કરવા માગે છે.

PhonePe: ભારતમાં UPI ટ્રાન્ઝેક્શનનો કિંગ

2015માં સ્થપાયેલી PhonePe ભારતમાં UPI ટ્રાન્ઝેક્શનનું નેતૃત્વ કરે છે. કંપનીના 61 કરોડથી વધુ રજિસ્ટર્ડ યુઝર્સ છે, અને તેના પ્લેટફોર્મ દ્વારા દરરોજ લગભગ 34 કરોડ રૂપિયાના ટ્રાન્ઝેક્શન થાય છે. ભારતમાં થતા કુલ UPI ટ્રાન્ઝેક્શનનો લગભગ 50 ટકા હિસ્સો PhonePeનો છે, જે તેને માર્કેટ લીડર બનાવે છે. ગૂગલ પે બીજા સ્થાને છે, જ્યારે PhonePe અને ગૂગલ પે સાથે મળીને UPI માર્કેટનો 80 ટકા હિસ્સો ધરાવે છે. પેટીએમ આ રેસમાં ત્રીજા ક્રમે છે.