Tata Capital IPO: ટાટા કેપિટલના IPOથી આ કંપનીને મોટી કમાણી, 3.58 કરોડ શેર વેચવાનો બનાવી રહ્યાં છે પ્લાન

Tata Capital IPO: ટાટા ગ્રુપની નોન-બેન્કિંગ ફાઇનાન્શિયલ કંપની ટાટા કેપિટલ આગામી દિવસોમાં 17,000 કરોડ રૂપિયાનો IPO લાવવાની તૈયારીમાં છે. આ IPO ઓક્ટોબરના મધ્યમાં સબ્સ્ક્રિપ્શન માટે ખુલી શકે છે. આમાંથી અનેક કંપનીઓને મોટો ફાયદો થવાની આશા છે, અને તેમાં વર્લ્ડ બેન્ક ગ્રુપની પ્રાઇવેટ સેક્ટર યુનિટ ઇન્ટરનેશનલ ફાઇનાન્સ કોર્પોરેશન (IFC) પણ સામેલ છે. IFC ટાટા કેપિટલમાં પોતાની હિસ્સેદારી ઘટાડીને આ IPOથી ભારે નફો કમાવવાની યોજના ધરાવે છે.

ડ્રાફ્ટ રેડ હેરિંગ પ્રોસ્પેક્ટસ (DRHP)ના તાજા અપડેટ અનુસાર, IFC આ ઇશ્યુમાં 3.58 કરોડ શેર વેચવાની છે. આ શેર 2011માં ટાટા કેપિટલના ક્લીનટેક બિઝનેસમાં કરેલા પ્રારંભિક રોકાણનો ભાગ છે. આ વિષયની જાણકારી રાખતા લોકોના જણાવ્યા પ્રમાણે, ભારતીય રિઝર્વ બેન્ક (RBI)એ શેર્સને લિસ્ટ કરવા માટે વધુ સમય આપ્યા પછી, ટાટા કેપિટલ ઓક્ટોબરના પહેલા અઠવાડિયામાં પોતાનો આ મોટો IPO લોન્ચ કરી શકે છે. અગાઉ આ કંપનીને શેર માર્કેટમાં લિસ્ટ થવા માટે 30 સપ્ટેમ્બર સુધીની મુદત આપવામાં આવી હતી.

2011માં વર્લ્ડ બેન્ક ગ્રુપની પ્રાઇવેટ સેક્ટર યુનિટ IFCએ ટાટા કેપિટલ સાથે મળીને ટાટા ક્લીનટેક કેપિટલ લિમિટેડ (TCCL)ની સ્થાપના કરી હતી. તેનો મુખ્ય ઉદ્દેશ રિન્યુએબલ અને સસ્ટેનેબલ ઇન્ફ્રાસ્ટ્રક્ચર પ્રોજેક્ટ્સને ફંડિંગ પૂરું પાડવાનો હતો. તે સમયે ભારતમાં ક્લીન એનર્જીને હજુ સબ્સિડી પર આધારિત સેક્ટર માનવામાં આવતું હતું. છેલ્લા એક દાયકામાં TCCL એક અગ્રણી ગ્રીન ફાઇનાન્સર તરીકે ઉભરી આવી છે. તેણે સોલર, વિન્ડ, બાયોમાસ, સ્મોલ હાઇડ્રો, વોટર ટ્રીટમેન્ટ અને ઇલેક્ટ્રિક ટ્રાન્સપોર્ટ જેવા સેક્ટર્સમાં 500થી વધુ રિન્યુએબલ પ્રોજેક્ટ્સને સપોર્ટ આપ્યો છે.

આ ઉપરાંત, કંપનીએ 22,400 મેગાવોટથી વધુ ક્લીન એનર્જી કેપેસિટીને મંજૂરી આપી છે અને દેશમાં સૌથી વ્યાપક ક્લીનટેક પોર્ટફોલિયોમાંથી એક તૈયાર કર્યો છે. દસ્તાવેજોમાં જણાવ્યા પ્રમાણે, ફાઇનાન્શિયલ યર 2024-25 સુધીમાં ક્લીનટેક અને ઇન્ફ્રાસ્ટ્રક્ચર લોન 18,000 કરોડ રૂપિયાને પાર કરી ગયા છે. આ છેલ્લા બે વર્ષમાં વાર્ષિક 32 પર્સન્ટના દરે વધ્યા છે. TCCLના ટાટા કેપિટલમાં મર્જર પછી, IFC પાસે હવે ટાટા કેપિટલમાં 7.16 કરોડ શેર અથવા લગભગ 1.8 પર્સન્ટ હિસ્સેદારી છે. તેમાંથી તે આગામી IPOમાં 3.58 કરોડ શેર વેચવાની યોજના બનાવી રહી છે.

આ પણ વાંચો-હિન્દુસ્તાન યુનિલિવરની મોટી જાહેરાત: લાઇફબોય, લક્સ, ડવ સહિતના પ્રોડક્ટ્સ પર ભાવ ઘટાડો!