બાંગ્લાદેશ ભડકે બળ્યું: શેખ હસીનાને ફાંસી થશે? ઢાકામાં શૂટ એટ સાઈટના ઓર્ડર, ચુકાદો લાઈવ દેખાડાશે

બાંગ્લાદેશ આજે એક એવા ઐતિહાસિક તબક્કા પર ઊભું છે, જ્યાંથી દેશનું ભવિષ્ય નક્કી થશે. પૂર્વ વડાપ્રધાન શેખ હસીના વિરુદ્ધ ચાલી રહેલા કેસમાં આજે આંતરરાષ્ટ્રીય ક્રાઈમ ટ્રિબ્યુનલ પોતાનો ચુકાદો સંભળાવશે. સરકારી વકીલોએ 78 વર્ષીય હસીના માટે મૃત્યુદંડની માંગણી કરતાં સમગ્ર દેશમાં તંગદિલીનો માહોલ છે. પરિસ્થિતિ એટલી ગંભીર છે કે મોહમ્મદ યુનુસની વચગાળાની સરકારે હિંસા અને આગચંપી કરનારાઓને દેખતા જ ગોળી મારવાનો (શૂટ એટ સાઈટ) આદેશ આપ્યો છે.

આજે આવનારા ચુકાદાનું ઢાકામાં મોટી સ્ક્રીન પર જીવંત પ્રસારણ કરવામાં આવશે અને તેને ફેસબુક પર પણ જોઈ શકાશે. આ નિર્ણય પહેલાં જ બાંગ્લાદેશમાં હિંસા ફાટી નીકળી છે. અનેક જગ્યાએ આગચંપી અને બોમ્બમારાની ઘટનાઓ બની છે.

શેખ હસીનાનો ભાવુક સંદેશ અને પુત્રની ચેતવણી

શેખ હસીનાની પાર્ટી 'અવામી લીગ' પર પ્રતિબંધ મૂકી દેવામાં આવ્યો છે, જેના કારણે તે ચૂંટણી લડી શકશે નહીં. ચુકાદા પહેલાં ભારતમાંથી તેમણે એક ભાવુક ઓડિયો સંદેશ જાહેર કર્યો હતો, જેમાં તેમણે કહ્યું હતું કે, "અન્યાય કરનારાઓને એક દિવસ બંગાળની ધરતી પર જનતા સજા આપશે. ડરવાની કોઈ જરૂર નથી. હું જીવિત છું અને દેશની જનતાની સાથે રહીશ. ઇન્શાઅલ્લાહ, આ ગુનેગારોને બંગાળની ધરતી પર સજા આપીશ."

દરમિયાન, તેમના પુત્ર સજીબ વાજેદે ચેતવણી આપી છે કે જો તેમની પાર્ટી પરનો પ્રતિબંધ હટાવવામાં નહીં આવે, તો તેમના સમર્થકો ફેબ્રુઆરીમાં યોજાનારી રાષ્ટ્રીય ચૂંટણીમાં અવરોધ ઊભો કરશે. તેમણે કહ્યું, "અમને ખબર છે કે ચુકાદો શું આવવાનો છે. તેઓ તેને દોષિત ઠેરવશે અને કદાચ મોતની સજા પણ આપશે. પરંતુ તેઓ મારી માનું શું કરી શકે? મારી માતા ભારતમાં સુરક્ષિત છે."

દેશભરમાં હિંસા અને 'શૂટ એટ સાઈટ'નો આદેશ

ચુકાદા પહેલાં જ બાંગ્લાદેશમાં હિંસા વકરી છે. ઢાકામાં મોહમ્મદ યુનુસના સલાહકાર સૈયદ રિઝવાના હસનના ઘરની બહાર ક્રૂડ બોમ્બથી હુમલો કરવામાં આવ્યો છે. કોક્સબજાર સહિત અનેક શહેરોમાં અવામી લીગના કાર્યકરોએ હંગામો મચાવ્યો છે.