Ahmedabad School Bomb Threat: અમદાવાદ શહેરમાં આજે સવારથી જ શાળાઓ અને વાલીઓમાં ભયનો માહોલ ફેલાયો છે. શહેરની 12 જાણીતી શાળાઓને એક ધમકીભર્યો ઈમેલ મળ્યો હતો, જેમાં શાળાઓને બોમ્બથી ઉડાવી દેવાની વાત કરવામાં આવી હતી. આ ઘટનાને પગલે શાળા સંચાલકો અને પોલીસ તંત્રમાં તાત્કાલિક દોડધામ મચી ગઈ હતી અને સાવચેતીના ભાગરૂપે તમામ વિદ્યાર્થીઓને સુરક્ષિત રીતે ઘરે મોકલી દેવામાં આવ્યા હતા.
Ahmedabad School Bomb Threat: અમદાવાદની 12 શાળાઓમાં બોમ્બની ધમકી, વિદેશી IP એડ્રેસથી આવ્યો ઈમેલ, પોલીસતંત્ર દોડતું થયું
Ahmedabad School Bomb Threat: અમદાવાદની 8 પ્રતિષ્ઠિત શાળાઓને બોમ્બથી ઉડાવી દેવાની ધમકી મળતા ચકચાર. વિદેશી IP એડ્રેસથી મોકલાયેલા આ ઈમેલમાં અમિત શાહનો પણ ઉલ્લેખ છે. જાણો સમગ્ર ઘટના અને પોલીસની કાર્યવાહી.
MoneyControl Newsઅપડેટેડ Dec 17, 2025 પર 12:29 PM
કઈ શાળાઓને નિશાન બનાવાઈ?
આ ધમકીભર્યા ઈમેલમાં અમદાવાદ અને તેની આસપાસની કુલ 12 શાળાઓનો ઉલ્લેખ કરવામાં આવ્યો હતો, જેમાં નીચે મુજબની શાળાઓનો સમાવેશ થાય છે:
* ઝેબર સ્કૂલ, થલતેજ
* મહારાજા અગ્રસેન સ્કૂલ, ગુરુકુળ રોડ
* DAV ઈન્ટરનેશનલ સ્કૂલ, મકરબા
* નિર્માણ સ્કૂલ, વસ્ત્રાપુર
* ઝાયડસ સ્કૂલ, વેજલપુર
* CBSE ડિવાઇન ચાઇલ્ડ સ્કૂલ, અડાલજ
* આવિષ્કાર સ્કૂલ, કલોલ
* જેમ્સ એન્ડ જેનીસીસ સ્કૂલ, ખોરજ-ખોડિયાર
* અમદાવાદ ઇન્ટરનેશનલ સ્કૂલ, વસ્ત્રાપુર
* ઉદગમ સ્કૂલ, થલતેજ
* DPS બોપલ
* તુલિપ ઇન્ટરનેશનલ સ્કૂલ, બોપલ
ઈમેલમાં શું હતી ધમકી?
પોલીસ સૂત્રોના જણાવ્યા અનુસાર, આ ધમકીભર્યો ઈમેલ સવારે 8:33 વાગ્યે મોકલવામાં આવ્યો હતો. ઈમેલનું શીર્ષક (Subject) જ બોમ્બ બ્લાસ્ટની ચેતવણી આપતું હતું. તેમાં સ્પષ્ટપણે લખવામાં આવ્યું હતું કે બપોરે 1:11 વાગ્યે સ્કૂલોમાં બ્લાસ્ટ થશે. આટલું જ નહીં, ઈમેલમાં કેન્દ્રીય ગૃહમંત્રી અમિત શાહ અને લોરેન્સ બિશ્નોઈને પણ નિશાન બનાવવાનો ઉલ્લેખ હતો, સાથે જ સાબરમતી જેલને પણ ઉડાવી દેવાની ધમકી અપાઈ હતી. પ્રાથમિક તપાસમાં સાયબર ક્રાઈમની ટીમને જાણવા મળ્યું છે કે આ ઈમેલ વિદેશી IP એડ્રેસ પરથી મોકલવામાં આવ્યો હતો, જેથી ભયનો માહોલ ફેલાવી શકાય.
શાળા અને પોલીસની ત્વરિત કાર્યવાહી
સવારે લગભગ 10 વાગ્યાની આસપાસ જ્યારે શાળા સંચાલકોના ધ્યાનમાં આ ઈમેલ આવ્યો, ત્યારે તેમણે કોઈપણ પ્રકારનું જોખમ લીધા વિના તાત્કાલિક પોલીસ કંટ્રોલ રૂમને જાણ કરી. ઘટનાની ગંભીરતાને ધ્યાનમાં રાખીને, સ્થાનિક પોલીસ, સ્પેશિયલ ઓપરેશન ગ્રુપ (SOG), ફાયર બ્રિગેડ અને બોમ્બ ડિસ્પોઝલ સ્કવોડ (BDDS)ની ટીમો તરત જ ઘટનાસ્થળોએ પહોંચી ગઈ હતી. શાળાઓમાંથી તમામ વિદ્યાર્થીઓને વર્ગખંડમાંથી બહાર કાઢી સુરક્ષિત રીતે તેમના વાલીઓ સાથે ઘરે મોકલી દેવામાં આવ્યા હતા. આ સમાચાર ફેલાતા જ વાલીઓ પણ ચિંતાતુર થઈને શાળાઓએ દોડી આવ્યા હતા.
તપાસનો ધમધમાટ શરૂ
હાલમાં, બોમ્બ સ્કવોડ અને ડોગ સ્કવોડ દ્વારા તમામ શાળાઓના કેમ્પસમાં ખૂણે-ખૂણાની સઘન તપાસ કરવામાં આવી રહી છે. વેજલપુરના પોલીસ ઇન્સ્પેક્ટરે જણાવ્યું કે, "ઈમેલ મળ્યા બાદ તરત જ તમામ સુરક્ષા એજન્સીઓ કામે લાગી ગઈ છે. સાયબર ક્રાઈમની ટીમ ઈમેલના મૂળ સુધી પહોંચવા માટે તપાસ કરી રહી છે કે આ કૃત્ય કોના દ્વારા અને ક્યાંથી કરવામાં આવ્યું છે." ઉલ્લેખનીય છે કે, ભૂતકાળમાં પણ આવી રીતે ફેક ઈમેલ દ્વારા શાળાઓને નિશાન બનાવવાનો પ્રયાસ થઈ ચૂક્યો છે. હાલમાં, પોલીસ દ્વારા વાલીઓને શાંતિ જાળવવા અપીલ કરવામાં આવી છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.