G20 શિખર સંમેલન: પ્રાદેશિક અખંડિતતાનો રણટંકાર અને PM મોદીના મહત્ત્વપૂર્ણ પ્રસ્તાવો

G20 Summit: વૈશ્વિક રાજકારણ અને વિકાસના એજન્ડા પર ચર્ચા કરવા માટે G20 સભ્ય દેશોના નેતાઓ તાજેતરમાં જોહાનિસબર્ગમાં 20મી વાર્ષિક શિખર સંમેલનમાં એકઠા થયા હતા. આ સંમેલન અનેક મહત્ત્વપૂર્ણ નિર્ણયો અને પ્રસ્તાવો સાથે સમાપ્ત થયું, જે ભવિષ્યમાં વિશ્વની દિશા નક્કી કરવામાં મદદરૂપ થશે. પ્રાદેશિક અખંડિતતા જાળવવા અને વિશ્વમાં શાંતિ સ્થાપિત કરવા પર ભાર મૂકવામાં આવ્યો હતો, જ્યારે ભારતના વડાપ્રધાન નરેન્દ્ર મોદીએ અનેક દૂરંદેશી પ્રસ્તાવો રજૂ કર્યા, જેણે વૈશ્વિક પડકારોના સમાધાન માટે એક નવો માર્ગ ચીંધ્યો.

G20 સંમેલનનું સંયુક્ત ઘોષણાપત્ર

G20 સંમેલન પછી જાહેર કરાયેલા સંયુક્ત ઘોષણાપત્રમાં સભ્ય દેશોએ સ્પષ્ટપણે જણાવ્યું હતું કે, કોઈપણ દેશે આંતરરાષ્ટ્રીય સ્તરે માન્યતા પ્રાપ્ત સરહદોમાં ફેરફાર કરવા માટે બળનો ઉપયોગ કે ધમકી આપવી જોઈએ નહીં. આ સંદેશ સાર્વભૌમત્વ અને પ્રાદેશિક અખંડિતતા પ્રત્યેની વૈશ્વિક પ્રતિબદ્ધતાને વધુ મજબૂત બનાવે છે. આ મુદ્દે G20 દેશોની એકતા વર્તમાન વૈશ્વિક પરિસ્થિતિમાં અત્યંત મહત્ત્વપૂર્ણ બની રહે છે.

ભારતનો મજબૂત અને સ્પષ્ટ અવાજ

વડાપ્રધાન નરેન્દ્ર મોદીએ G20 સંમેલનમાં ભારતના મજબૂત અને સ્પષ્ટ અવાજને રજૂ કર્યો. તેમણે આતંકવાદ વિરુદ્ધ ભારતની સશક્ત સ્થિતિને પુનરાવર્તિત કરી હતી અને ડ્રગ્સની દાણચોરી અને આતંકવાદ વચ્ચે વધતા જોખમી સંબંધોને નાથવા માટે G20ની એક વિશેષ ટીમ બનાવવાનો પ્રસ્તાવ રજૂ કર્યો હતો. ફેન્ટનાઈલ જેવા અત્યંત ખતરનાક પદાર્થોના પ્રસારને રોકવા માટે આવા સહયોગની અનિવાર્યતા પર તેમણે ભાર મૂક્યો.

આ ઉપરાંત, વડાપ્રધાન મોદીએ વૈશ્વિક સ્વાસ્થ્ય માટે એક રિસ્પોન્સ ટીમ બનાવવાની પણ હિમાયત કરી હતી. તેમણે કહ્યું કે, મહામારી અને પ્રાકૃતિક આપત્તિઓનો સામનો કરવા માટે તમામ દેશોએ સાથે આવવું અનિવાર્ય છે. આ રિસ્પોન્સ ટીમ કોઈપણ કટોકટીમાં તુરંત તૈનાત થઈ શકે તેવું આયોજન હોવું જોઈએ, જેથી વૈશ્વિક સ્તરે સ્વાસ્થ્ય ઇમરજન્સી અને કુદરતી આફતોનો મજબૂત રીતે સામનો કરી શકાય.

10 લાખ આફ્રિકન યુવાનોને ટેકનોલોજીની તાલીમ આપવાનો પ્રસ્તાવ