સેબી ચીફ માધબી પુરીને સરકારે આપી ક્લીનચીટ, તપાસમાં નથી મળ્યું કંઈ વાંધાજનક

સરકારે સેબી ચીફ માધબી પુરી બુચને તપાસમાં નિર્દોષ જાહેર કર્યા છે. સરકારી સૂત્રોએ જણાવ્યું હતું કે બૂચ સામેની તપાસમાં કશું વાંધાજનક મળ્યું નથી. સૂત્રોએ જણાવ્યું કે તે પોતાનો કાર્યકાળ પૂર્ણ કરશે. તેમનો કાર્યકાળ ફેબ્રુઆરી 2025માં સમાપ્ત થશે. સેબી ચીફ સામે નાણાકીય અનિયમિતતાઓ અને હિતોના સંઘર્ષને લગતા ગંભીર આરોપો મૂકવામાં આવ્યા હતા, ત્યારબાદ તપાસ શરૂ કરવામાં આવી હતી. કોંગ્રેસ પાર્ટી અને અમેરિકન શોર્ટ સેલર હિંડનબર્ગ રિસર્ચે સેબીના વડા સામે આક્ષેપો કર્યા હતા.

બુચને હિતોના સંઘર્ષ અને નાણાકીય અનિયમિતતાના આરોપોની તપાસનો સામનો કરવો પડ્યો હતો. હિંડનબર્ગ રિસર્ચે હિતોના સંઘર્ષ અને નાણાકીય અનિયમિતતાના આરોપો પર સેબીના ચેરપર્સન માધાબી પુરી બુચના મૌન પર સવાલ ઉઠાવ્યા ત્યારે વિવાદ શરૂ થયો. હિન્ડેનબર્ગે જણાવ્યું હતું કે બુચના અદાણી જૂથ સાથે અઘોષિત નાણાકીય સંબંધો હોઈ શકે છે, જેની પણ તપાસ ચાલી રહી છે.

આરોપોનો જવાબ આપતા માધાબી પુરી બુચ અને તેના પતિ ધવલ બુચે હિંડનબર્ગ રિપોર્ટમાં કરાયેલા દાવાઓને પાયાવિહોણા ગણાવ્યા હતા. બંનેએ કહ્યું કે તેમનો નાણાકીય રેકોર્ડ પારદર્શક છે અને આ આરોપોનો હેતુ 'પાત્ર હત્યા' છે. હિંડનબર્ગના દાવાઓને ફગાવીને બુચ દંપતીએ આ સંદર્ભે સંયુક્ત નિવેદન બહાર પાડ્યું હતું. દંપતીએ કહ્યું કે તેઓએ બે વર્ષ પહેલાં ફંડમાં રોકાણ કર્યું હતું, જ્યારે બુચ સેબીમાં જોડાયા ન હતા.

કોંગ્રેસે હુમલાઓ તેજ કર્યા ત્યારે આ વિવાદ વધુ વકર્યો હતો. 2 સપ્ટેમ્બર, 2024ના રોજ કોંગ્રેસના નેતા પવન ખેરાએ બુચ પર સેબીના વડા બન્યા પછી પણ ICICI બેંકમાંથી આવક મેળવવાનો આરોપ લગાવ્યો હતો. દસ્તાવેજોને ટાંકીને ખેરાએ આરોપ લગાવ્યો હતો કે, બુચને 2017 થી 2024 દરમિયાન ICICI બેંકમાંથી 17 કરોડ રૂપિયાનો પગાર મળ્યો હતો.