Gujarat rain: શ્રાવણનો શ્રીકાર વરસાદ, જન્માષ્ટમીએ 183 તાલુકામાં મેઘમહેર

Gujarat rain: શ્રાવણ મહિનામાં ગુજરાતમાં વરસાદનો નવો રાઉન્ડ શરૂ થયો છે. જન્માષ્ટમીના પવિત્ર દિવસે રાજ્યના 183 તાલુકામાં મેઘમહેર જોવા મળી. સ્ટેટ ઇમરજન્સી ઓપરેશન સેન્ટર, ગાંધીનગરના આંકડા અનુસાર, 16 ઓગસ્ટના સવારે 6:00થી રાત્રે 8:00 સુધી 183 તાલુકામાં વરસાદ નોંધાયો. સૌથી વધુ વરસાદ જૂનાગઢના ભેંસાણમાં 3.74 ઇંચ નોંધાયો.

વરસાદની વિગતો

જૂનાગઢના ભેંસાણ ઉપરાંત, દાંતીવાડામાં 3.58 ઇંચ, ધારીમાં 2.99 ઇંચ, જામકંડોરણામાં 2.80 ઇંચ અને હળવદમાં 2.76 ઇંચ વરસાદ ખાબક્યો. આ ઉપરાંત, દસાડા, રાણપુર, ખેડા, ઉના, લીંબડી અને હાંસોટમાં પણ 2 ઇંચથી વધુ વરસાદ નોંધાયો. કુલ 11 તાલુકામાં 2 ઇંચથી વધુ, જ્યારે 172 તાલુકામાં 1થી 50 મીમી વરસાદ નોંધાયો.

અમદાવાદમાં ભારે વરસાદ

અમદાવાદ શહેરમાં પણ વરસાદે જોર પકડ્યું. દુધેશ્વર અને મેમ્કોમાં 4.5 ઇંચ, મેમનગર અને ઉસ્માનપુરામાં 4 ઇંચ, કાલુપુરમાં 3.5 ઇંચ અને થલતેજમાં 3.2 ઇંચ વરસાદ નોંધાયો. બોડકદેવ, નિકોલ અને નવરંગપુરામાં પણ 2.5થી 2.9 ઇંચ વરસાદ પડ્યો.

હવામાન વિભાગની આગાહી

હવામાન વિભાગે આગામી પાંચ દિવસ માટે ભારેથી અતિભારે વરસાદની આગાહી કરી છે. હાલ રાજ્યમાં ચાર વાતાવરણીય સિસ્ટમ સક્રિય છે, અને ટૂંક સમયમાં પાંચમી સિસ્ટમ પણ સક્રિય થઈ શકે છે. 17 ઓગસ્ટે સુરત, ડાંગ, તાપી, નવસારી અને વલસાડમાં અતિભારે વરસાદની આગાહી સાથે ઓરેન્જ એલર્ટ જાહેર કરાયું છે. જૂનાગઢ, પોરબંદર, ગીર સોમનાથ, ભાવનગર, સાબરકાંઠા, વડોદરા, ભરૂચ સહિતના જિલ્લાઓમાં ભારે વરસાદની શક્યતા છે.