IND vs PAK: 3 મોટી ભૂલો જેણે પાકિસ્તાનની ઈજ્જત કાઢી, ભારત સામે હાર માટે કેપ્ટન સલમાન આગા વિલન

Ind vs Pak: ક્રિકેટના મેદાનમાં જ્યારે ભારત અને પાકિસ્તાન આમને-સામને હોય ત્યારે રોમાંચ તેની ચરમસીમા પર હોય છે. ટી20 વર્લ્ડ કપ 2026ના હાઈવોલ્ટેજ જંગમાં ભારતે ફરી એકવાર પાકિસ્તાનને ધૂળ ચટાડી છે. કોલંબોના આર. પ્રેમદાસા સ્ટેડિયમમાં રમાયેલી મેચમાં પાકિસ્તાનને 61 રને કારમી હારનો સામનો કરવો પડ્યો છે. આ હાર સાથે જ પાકિસ્તાન ભારત સામે આંતરરાષ્ટ્રીય ક્રિકેટમાં સતત 10મી મેચ હારી ગયું છે.

જોકે, આ હાર બાદ પાકિસ્તાની ક્રિકેટ ફેન્સ અને વિવેચકોનો ગુસ્સો સાતમા આસમાને છે અને તેમના નિશાના પર છે કેપ્ટન સલમાન આગા. મેચમાં ખેલાડીઓના ખરાબ પ્રદર્શન કરતા પણ વધારે ચર્ચા સલમાન આગાની નબળી કેપ્ટનશિપની થઈ રહી છે. ચાલો જાણીએ એવી 3 મોટી ભૂલો વિશે, જેણે પાકિસ્તાનની જીતની બાજી બગાડી નાખી.

1. ટોસ જીતીને બોલિંગ કરવાનો નિર્ણય ‘આત્મઘાતી' સાબિત થયો

કોલંબોના આર. પ્રેમદાસા સ્ટેડિયમની પીચનો ઈતિહાસ રહ્યો છે કે અહીં બીજી ઈનિંગમાં પીચ ધીમી પડી જાય છે અને સ્પિનરોને મદદ મળે છે. આ વાત જાણવા છતાં સલમાન આગાએ ટોસ જીતીને પહેલા ફિલ્ડિંગ કરવાનો નિર્ણય લીધો, જે સૌથી મોટું ‘બ્લન્ડર' સાબિત થયું.

આવી મોટી મેચમાં હંમેશા સ્કોર બોર્ડ પર રનનું પ્રેશર સામેની ટીમ પર નાખવું ફાયદાકારક હોય છે. જો પાકિસ્તાને પહેલા બેટિંગ કરી હોત, તો બીજી ઈનિંગમાં ભારતીય બેટ્સમેનોને તૂટતી પીચ પર રમવું મુશ્કેલ પડત. પરંતુ સલમાનના આ એક નિર્ણયે ભારતીય સ્પિનરોનું કામ આસાન કરી દીધું અને પાકિસ્તાની બેટ્સમેનો બીજી ઈનિંગમાં લાચાર જોવા મળ્યા.

2. લયમાં હોવા છતાં પોતાની બોલિંગ રોકી દીધી

મેચની શરૂઆતમાં સલમાન આગાએ એક શાનદાર લીડરની જેમ જવાબદારી લીધી હતી. તેણે પહેલી જ ઓવરમાં ખતરનાક ભારતીય ઓપનર અભિષેક શર્માને 0 રન પર આઉટ કરીને ભારતને મોટો ઝટકો આપ્યો હતો. તે સમયે બોલ ટર્ન થઈ રહ્યો હતો અને ભારતીય બેટ્સમેનો સલમાન સામે સંઘર્ષ કરી રહ્યા હતા.