NEET UG 2026 Paper Leak: પરીક્ષાના 3 દિવસ પહેલા જ લીક થઈ ગયું હતું પેપર, CBIની ચાર્જશીટમાં થયા ચોંકાવનારા ખુલાસા

NEET UG 2026 Paper Leak: મેડિકલ પ્રવેશ પરીક્ષા NEET UG 2026 પેપર લીક કેસમાં સીબીઆઈની ચાર્જશીટમાંથી અત્યંત ચોંકાવનારા ખુલાસા થયા છે. સેન્ટ્રલ બ્યુરો ઓફ ઇન્વેસ્ટિગેશનનો દાવો છે કે નેશનલ ટેસ્ટિંગ એજન્સીના એક્સપર્ટ્સ, કોચિંગ સેન્ટરના સંચાલકો અને વચેટિયાઓએ ભેગા મળીને લાખો રૂપિયાનો ખેલ પાડ્યો હતો. આ લોકોએ પરીક્ષાના 3 દિવસ પહેલા જ પેપર લીક કરી દીધું હતું અને તેને WhatsApp, Telegram તેમજ ઓફલાઈન ક્લાસ દ્વારા વિદ્યાર્થીઓ સુધી પહોંચાડ્યું હતું.

કેમિસ્ટ્રી એક્સપર્ટના ઘરે ચાલ્યા 'સ્પેશિયલ ક્લાસ'

CBI ના જણાવ્યા અનુસાર, NTA ના કેમિસ્ટ્રી વિષયના એક્સપર્ટ પી. વી. કુલકર્ણીએ ગોપનીયતાના શપથ લીધા હોવા છતાં નિયમો નેવે મૂકી દીધા હતા. તેમણે પુણેમાં 25 થી 27 એપ્રિલ વચ્ચે "સ્પેશિયલ ક્લાસ" ચલાવ્યા હતા, જેમાં વિદ્યાર્થીઓને એ જ સવાલો અને જવાબો લખાવ્યા જે પછીથી NEET ની પરીક્ષામાં પૂછાયા હતા. મહારાષ્ટ્રના લાતુરમાં પણ આવા ક્લાસ ચાલ્યા હતા. તપાસમાં 'માય ગેટ'એપના રેકોર્ડ, મોબાઈલ લોકેશન અને કોલ ડિટેલ પરથી સાબિત થયું છે કે વિદ્યાર્થીઓ કુલકર્ણીના ઘરે ગયા હતા. આ ઉપરાંત, કુલકર્ણીના મોબાઈલમાંથી કેમિસ્ટ્રીના સવાલોના ફોટા અને વાલીઓ સાથેની વાતચીતના ડિજિટલ પુરાવા પણ મળ્યા છે. એક વાલી તો એટલા ખુશ હતા કે તેમણે કુલકર્ણીને મોંઘી ઘડિયાળ ગિફ્ટમાં આપવાની ઈચ્છા વ્યક્ત કરી હતી.

માત્ર 25 હજાર રૂપિયામાં વેચાયું ફિઝિક્સનું પેપર

તપાસમાં એ પણ બહાર આવ્યું છે કે કુલકર્ણીએ ફિઝિક્સનું પેપર મેળવવાનો પણ પ્રયાસ કર્યો હતો. ફિઝિક્સ વિષયના એક્સપર્ટ મનીષા હવાલદાર પર આરોપ છે કે તેમણે માત્ર 25 હજાર રૂપિયા લઈને ફિઝિક્સના સવાલો લીક કર્યા હતા. પરીક્ષાના 8 દિવસ પહેલા તેમના મોબાઈલમાં હાથથી લખેલા સવાલો હતા, જે તેમણે તેજસ શાહ નામના આરોપીને લખાવ્યા હતા.

નેટવર્ક કેવી રીતે કામ કરતું હતું?

આ આખા કૌભાંડમાં મનીષા વાઘમારે નામની મહિલા વચેટિયા તરીકે કામ કરતી હતી. તેણે વાલીઓ પાસેથી 4 લાખ રૂપિયા સુધીની રકમ વસૂલી હતી અને વિદ્યાર્થીઓને ઓફલાઈન ક્લાસમાં બેસાડ્યા હતા. તેણે WhatsApp પર ફિઝિક્સના સવાલો પણ મોકલ્યા હતા અને એવી શરત મૂકી હતી કે જો પરીક્ષામાં આ જ સવાલો આવશે તો ઉપરથી બીજા 50 હજાર રૂપિયા આપવા પડશે. બીજી તરફ, મનીષા ગુરુનાથ મંદારે પર આરોપ છે કે તેણે પોતાના ઘરે બાયોલોજીના ક્લાસ લીધા હતા અને નવી NCERT બુકમાંથી અમુક ફકરાઓ ટીક કરાવ્યા હતા.