કર્તવ્ય પથ પર ભારતીય સેનાનો દબદબો: 'ભૈરવ બટાલિયન'થી લઈને રાફેલ સુધીની તાકાત જોઈ દુશ્મનોમાં ફફડાટ!

Republic Day Parade: પ્રજાસત્તાક દિવસની પરેડમાં આ વખતે દિલ્હીના કર્તવ્ય પથ પર ભારતીય સેનાનું અદભૂત શૌર્ય જોવા મળ્યું હતું. સેનાની તાકાત અને આધુનિક હથિયારોનું પ્રદર્શન જોઈને દેશવાસીઓની છાતી ગજગજ ફૂલી ગઈ હતી, તો બીજી તરફ દુશ્મન દેશોમાં સોપો પડી ગયો હતો. આ પરેડમાં માત્ર પરંપરાગત હથિયારો જ નહીં, પરંતુ અત્યાધુનિક મિસાઈલો અને નવી રચાયેલી બટાલિયનોએ પણ પોતાની હાજરી નોંધાવી હતી.

ભૈરવ બટાલિયનનો દબદબો અને મેજર અંજુમનું નેતૃત્વ

આ વખતની પરેડનું સૌથી મોટું આકર્ષણ 'ભૈરવ બટાલિયન' રહી હતી. તમને જણાવી દઈએ કે ગયા વર્ષે હાથ ધરવામાં આવેલા 'ઓપરેશન સિંદૂર' બાદ ખાસ આ બટાલિયન તૈયાર કરવામાં આવી હતી. ઓપરેશન સિંદૂર પછી આ પહેલી ગણતંત્ર દિવસ પરેડ હતી જેમાં ભૈરવ બટાલિયને ભાગ લીધો હતો. કર્તવ્ય પથ પર જ્યારે આ ટુકડી નીકળી ત્યારે તેનું નેતૃત્વ મેજર અંજુમ કરી રહ્યા હતા. તેમનો જોશ અને શિસ્ત જોવાલાયક હતી.