ક્રિપ્ટોકરન્સીની દુનિયામાં ભારતનો ડંકો, ટોપ-10 દેશોની યાદીમાં સામેલ, જાણો કોણ છે નંબર 1 પર?

Cryptocurrency in India: ડિજિટલ કરન્સીની દુનિયામાં ભારત એક મોટી છલાંગ લગાવી રહ્યું છે. એક નવા રિપોર્ટ અનુસાર, નાણાકીય વ્યવહારો માટે ક્રિપ્ટોકરન્સીનો ઉપયોગ કરનારા ટોચના 10 દેશોની યાદીમાં ભારતે ગૌરવભેર 9મું સ્થાન મેળવ્યું છે. આ રિપોર્ટ દર્શાવે છે કે ભારતમાં લાખો લોકો હવે બચત કરવા, વિદેશમાં પૈસા મોકલવા અને રોજિંદા ખર્ચ માટે પણ ક્રિપ્ટોનો સહારો લઈ રહ્યા છે.

સ્ટેબલકોઈન્સ બન્યા ગેમ-ચેન્જર

ભારતમાં ક્રિપ્ટોના વધતા ઉપયોગ પાછળ સ્ટેબલકોઈન્સનો મોટો હાથ છે. સ્ટેબલકોઈન્સ એ એવી ક્રિપ્ટોકરન્સી છે જેની કિંમત ડોલર જેવી સ્થિર કરન્સી સાથે જોડાયેલી હોવાથી તેમાં વધુ ઉતાર-ચઢાવ જોવા મળતો નથી. જે એક સમયે માત્ર પ્રોફેશનલ ટ્રેડર્સ માટે હતા, તે હવે સામાન્ય લોકો માટે ડિજિટલ ફાઈનાન્સનો એક મહત્વનો હિસ્સો બની ગયા છે. જુલાઈ 2025માં સ્ટેબલકોઈન્સ દ્વારા થતા વૈશ્વિક વ્યવહારોએ રેકોર્ડ તોડી નાખ્યો હતો, જે તેની વધતી લોકપ્રિયતા દર્શાવે છે.

આ યાદીમાં કોણ છે ટોચ પર?

આ રિપોર્ટમાં ક્રિપ્ટોકરન્સીના ઉપયોગમાં સિંગાપોર પ્રથમ ક્રમે છે. ત્યાંની સ્પષ્ટ સરકારી નીતિઓ, લાયસન્સિંગની સરળ વ્યવસ્થા અને વૈશ્વિક સ્તરે નાણાકીય સંસ્થાઓના પ્રભાવને કારણે સિંગાપોર આ લિસ્ટમાં ટોચ પર છે. બીજા સ્થાને અમેરિકા છે, જ્યાં મજબૂત મૂડી બજાર અને લોકોમાં ક્રિપ્ટો પ્રત્યેના સકારાત્મક દૃષ્ટિકોણને કારણે તેનો વ્યાપક ઉપયોગ થાય છે. આ ઉપરાંત, લિથુઆનિયા પણ તેના સરળ લાયસન્સિંગ માળખાને કારણે ટોચના દેશોમાં સ્થાન ધરાવે છે.

જરૂરિયાતને કારણે પણ વધ્યો ક્રિપ્ટોનો ઉપયોગ

રસપ્રદ વાત એ છે કે યુક્રેન અને નાઈજીરિયા જેવા દેશો પણ આ યાદીમાં સામેલ છે. આ દેશોમાં આર્થિક અસ્થિરતા અને પરંપરાગત બેન્કિંગ સિસ્ટમની મર્યાદાઓને કારણે લોકો રેમિટેન્સ (વિદેશથી પૈસા મોકલવા) અને દૈનિક વ્યવહારો માટે મજબૂરીવશ ક્રિપ્ટો પર નિર્ભર રહે છે.