"દુનિયા કરતા વધુ મજબૂત છે ભારતની ઈકોનોમી!" વૈશ્વિક મંદી વચ્ચે પૂર્વ ECB ચીફનો મોટો દાવો, જાણો શું છે ભારતની સૌથી મોટી તાકાત?

Indian Economy: આજે જ્યારે આખી દુનિયા મંદી અને આર્થિક અનિશ્ચિતતાના ડરથી ચિંતિત છે, ત્યારે ભારત માટે એક ખૂબ જ સારા અને પોઝિટિવ સમાચાર આવ્યા છે. યુરોપિયન સેન્ટ્રલ બેંક (ECB) ના પૂર્વ વડા જોન-ક્લાઉડ ટ્રિસેટે ભારતની અર્થવ્યવસ્થા પર મોટો ભરોસો વ્યક્ત કર્યો છે. નવી દિલ્હીમાં આયોજિત 'કૌટિલ્ય ઈકોનોમિક એન્ક્લેવ'માં તેમણે સ્પષ્ટ શબ્દોમાં કહ્યું કે, વૈશ્વિક અર્થવ્યવસ્થાની સરખામણીમાં ભારતનું ભવિષ્ય ખૂબ જ ઉજ્જવળ અને મજબૂત છે. તેમણે દાવો કર્યો છે કે ભારત 2047 સુધીમાં 'વિકસિત ભારત' બનવાના પોતાના લક્ષ્ય તરફ એકદમ સાચી દિશામાં આગળ વધી રહ્યું છે. ચાલો જાણીએ પૂર્વ ECB ચીફે ભારતની ઈકોનોમી વિશે કઈ કઈ મોટી વાતો કહી છે.

વૈશ્વિક અર્થવ્યવસ્થા કરતા ભારતની સ્થિતિ ઘણી સારી

મનીકંટ્રોલ સાથેની ખાસ વાતચીતમાં ટ્રિસેટે જણાવ્યું કે તેઓ આખી દુનિયા કરતા ભારતની ઈકોનોમીને લઈને વધુ આશાવાદી છે. દુનિયાભરમાં અત્યારે મંદીનો માહોલ છે, પણ ભારતે જે રીતે આર્થિક સુધારાઓ કર્યા છે તે કાબિલેદાદ છે. દેશનો ગ્રોથ રેકોર્ડ એ વાતની સાબિતી આપે છે કે ભારતમાં અત્યારે આર્થિક મોરચે કંઈક મોટું અને સકારાત્મક થઈ રહ્યું છે.

‘મિડલ-ઇન્કમ ટ્રેપ'થી સુરક્ષિત છે ભારત

સામાન્ય રીતે વિકાસશીલ દેશો સામે ‘મિડલ-ઇન્કમ ટ્રેપ'નો ખતરો હોય છે. આ એવી સ્થિતિ છે જ્યાં દેશ એક ચોક્કસ આવક સ્તરે પહોંચીને અટકી જાય છે અને ક્યારેય વિકસિત દેશ બની શકતો નથી. પરંતુ ટ્રિસેટનું માનવું છે કે ભારત આ જાળમાં ફસાયા વિના ખૂબ જ ઝડપથી આગળ વધશે. તેમના મતે, ભારત પાસે અત્યારે વિકસિત દેશોની બરાબરી કરવા માટે ઘણી મોટી તકો રહેલી છે.

શું છે ભારતની સૌથી મોટી તાકાત?

ભારતના લાંબા ગાળાના વિકાસ પાછળનું સૌથી મોટું સીક્રેટ જણાવતા ટ્રિસેટે કહ્યું કે, ભારતની અસલી તાકાત તેનો ‘હ્યુમન કેપિટલ અને બ્રેન પાવર' છે. ભારત પાસે એન્જિનિયરો, વૈજ્ઞાનિકો અને ઉચ્ચ કુશળ પ્રોફેશનલ્સની કોઈ કમી નથી. આજે દુનિયાની ટોચની ટેક કંપનીઓમાં ભારતીય મૂળના એક્ઝિક્યુટિવ્સ અને એન્જિનિયર્સ ડંકો વગાડી રહ્યા છે, જે આ ટેલેન્ટનો જ જીવંત પુરાવો છે. આ ઉપરાંત ભારતની રાજકીય સ્થિરતા, લોકશાહી સંસ્થાઓ અને તાજેતરમાં થયેલા આર્થિક સુધારાઓ દેશને લાંબા ગાળે મોટો ફાયદો કરાવશે.