ટ્રમ્પની મુલાકાતની ઓફર પર ઈરાન ભડક્યું, "પહેલા 24 અબજ ડોલર આપો", મૌજતબા-ટ્રમ્પ મુલાકાતની શક્યતા નકારી

અમેરિકા અને ઈરાન વચ્ચે ચાલી રહેલી પડદા પાછળની કૂટનીતિને મોટો આંચકો લાગ્યો છે. ઈરાનના ટોચના નેતૃત્વએ અમેરિકી રાષ્ટ્રપતિ ડોનાલ્ડ ટ્રમ્પ અને ઈરાનના નવા સર્વોચ્ચ નેતા અયાતુલ્લા મૌજતબા ખામેનેઈ વચ્ચેની કોઈપણ સંભવિત મુલાકાતની વાતોને સ્પષ્ટપણે નકારી કાઢી છે. ઈરાનનું કડક વલણ છે કે જ્યાં સુધી વાટાઘાટોમાં પડેલી મડાગાંઠ નહીં ઉકેલાય, ત્યાં સુધી આવી કોઈ મુલાકાત ક્યારેય શક્ય નથી.

વાટાઘાટોમાં મડાગાંઠ માટે ટ્રમ્પ જવાબદાર

સીએનએનને આપેલા એક ખાસ ઈન્ટરવ્યુમાં મૌજતબા ખામેનેઈના વરિષ્ઠ સલાહકાર મોહસિન રઝાઈએ જણાવ્યું હતું કે, "અમેરિકા સાથે મુલાકાત ક્યારેય નહીં થાય. અત્યારે અમે વાટાઘાટોના પ્રાથમિક તબક્કામાં છીએ અને ટ્રમ્પે જ આખી પ્રક્રિયા અટકાવી દીધી છે. તેથી આ મુલાકાતનો કોઈ પ્રશ્ન જ ઊભો થતો નથી અને ડેડલોક તોડવાની સંપૂર્ણ જવાબદારી ટ્રમ્પની છે."

ઈરાનની 24 અબજ ડોલરની મોટી શરત

ઈરાને અમેરિકા સમક્ષ સ્પષ્ટ કર્યું છે કે જો તેઓ ફરીથી વિશ્વાસ કેળવવા માંગતા હોય, તો વાશિંગ્ટને પોતાની નીયત સાબિત કરવી પડશે. રઝાઈએ કહ્યું કે જો ટ્રમ્પ ખરેખર ગંભીર છે, તો તેમણે અમેરિકા દ્વારા ફ્રીઝ કરાયેલા ઈરાનના 24 અબજ ડોલર તરત જ રિલીઝ કરવા જોઈએ. અમેરિકા માટે આ રકમ મોટી નથી, પરંતુ ટ્રમ્પ માટે આ એક 'ટ્રસ્ટ ટેસ્ટ' સાબિત થશે. આ સાથે જ ઈરાને માંગ કરી છે કે અમેરિકા ઈઝરાયેલના પ્રભાવમાંથી મુક્ત થઈને નિર્ણયો લે અને તેમના પર લાગેલા તમામ પ્રતિબંધો હટાવે.

યુદ્ધ વધારવાની ખુલ્લી ધમકી

જો આ વાટાઘાટો નિષ્ફળ જશે તો ઈરાને અમેરિકાને ગંભીર સૈન્ય પરિણામો ભોગવવાની ચેતવણી આપી છે.