અમેરિકા-ઇઝરાયેલના હુમલામાં ઈરાનના સુપ્રીમ લીડર અલી ખામેનેઈનું મોત, ઈમામ રઝાની મજાર પર ધ્રુસ્કે ને ધ્રુસ્કે રડ્યા લોકો

Iran Supreme Leader killed: ઈરાન અત્યારે ભારે ગમગીન છે. અમેરિકા અને ઈઝરાયેલ દ્વારા કરવામાં આવેલા હુમલામાં ઈરાનના સુપ્રીમ લીડર આયાતુલ્લાહ અલી ખામેનેઈ માર્યા ગયા છે. તેમના મોતના સમાચાર સાંભળતા જ આખા ઈરાનમાં માતમ છવાઈ ગયો છે અને લોકોમાં શોકનું મોજું ફરી વળ્યું છે.

સમાચાર સાંભળતા જ બેસુધ થયા લોકો

ઈરાનની સરકારી ન્યૂઝ ચેનલ ‘પ્રેસ ટીવી' (Press TV) પર એન્કર દ્વારા અલી ખામેનેઈના મોતના સમાચાર ભારે હૈયે વાંચવામાં આવ્યા હતા. આ જાહેરાતની ગણતરીની મિનિટોમાં જ મશહદમાં આવેલી ઈમામ રઝાની પવિત્ર મજાર પર લોકો મોટી સંખ્યામાં એકઠા થઈ ગયા હતા. સામે આવેલા વીડિયોમાં જોઈ શકાય છે કે, લોકો પોતાના રહેબરને (નેતાને) ગુમાવવાના ગમમાં રસ્તાઓ પર ઉતરી આવ્યા છે અને મજાર પર ધ્રુસ્કે ને ધ્રુસ્કે રડતા અને બેસુધ થતા જોવા મળી રહ્યા છે.

પરિવારના સભ્યોએ પણ જીવ ગુમાવ્યો, 40 દિવસનો શોક

આ હુમલો એટલો ભયંકર હતો કે તેમાં માત્ર અલી ખામેનેઈ જ નહીં, પરંતુ તેમના પરિવારના સભ્યો પણ માર્યા ગયા છે. ઈરાનના સરકારી મીડિયાના અહેવાલો અનુસાર, આ ઈઝરાયેલ-અમેરિકી હુમલામાં અલી ખામેનેઈની દીકરી, જમાઈ, પૌત્રી અને પુત્રવધૂનું પણ મોત નીપજ્યું છે. આ મોટી દુર્ઘટનાને પગલે ઈરાન સરકારે દેશભરમાં 40 દિવસનો રાષ્ટ્રીય શોક અને 7 દિવસની જાહેર રજાની જાહેરાત કરી દીધી છે.