ઇઝરાયલે ઇરાન પર કર્યો હુમલો: જાણો ભારતીય શેરબજાર, અર્થવ્યવસ્થા અને તમારા ખિસ્સા પર શું થશે અસર?

Impact on Indian Economy: શનિવારે અમેરિકા અને ઇઝરાયલે સંયુક્ત રીતે ઇરાન પર મોટો હુમલો કર્યો છે. આ હુમલાની ગુંજ માત્ર મધ્ય પૂર્વમાં જ નહીં, પરંતુ ભારત સહિત આખી દુનિયાની અર્થવ્યવસ્થા પર સંભળાવા જઈ રહી છે. આંતરરાષ્ટ્રીય સ્તરે વધેલા આ તણાવને કારણે ભારતીય બજારોમાં ગભરાટનો માહોલ જોવા મળી શકે છે.

શેરબજારમાં જોવા મળી શકે છે મોટો કડાકો

શેરબજારના એક્સપર્ટ્સનું માનવું છે કે ઇરાન પર થયેલા આ હુમલાની સીધી અસર ભારતીય શેરબજાર પર જોવા મળશે. રોકાણકારો ડરના માર્યા મોટા પાયે શેરોનું વેચાણ (sell-off) કરી શકે છે, જેનાથી બજાર પર ભારે દબાણ આવશે. જોકે, હાલમાં બજારના નિષ્ણાતો એ વાત પર નજર રાખીને બેઠા છે કે ઇરાન આ હુમલાનો વળતો જવાબ કેવી રીતે આપે છે. આ તણાવ કેટલો લાંબો સમય ચાલશે, તેના પર જ શેરબજારની આગામી ચાલ નિર્ભર કરશે.

ક્રૂડ ઓઇલના ભાવમાં ભડકો થવાની ભીતિ

આપણે સૌ જાણીએ છીએ તેમ, ઇરાન દુનિયામાં ક્રૂડ ઓઇલ (કાચું તેલ) નું ઉત્પાદન કરતો એક ખૂબ મોટો દેશ છે. આ યુદ્ધની સ્થિતિને કારણે દુનિયાભરમાં ઓઇલની સપ્લાય ચેન ખોરવાઈ જવાનો ડર ઊભો થયો છે. અત્યારે ક્રૂડ ઓઇલનો ભાવ લગભગ 67 ડોલર પ્રતિ બેરલની આસપાસ ચાલી રહ્યો છે અને તેમાં 2% જેટલો વધારો તો પહેલેથી જ નોંધાઈ ચૂક્યો છે. જો હવે ક્રૂડના ભાવમાં નવો ઉછાળો આવશે, તો શોર્ટથી મીડિયમ ટર્મમાં ભારતીય બજારો પર તેની ખૂબ જ ખરાબ અસર પડશે.

ભારત માટે કેમ ચિંતાનો વિષય?

ભારત પોતાની જરૂરિયાતનું મોટાભાગનું ક્રૂડ ઓઇલ આયાત કરે છે. જો કાચું તેલ મોંઘુ થશે, તો તેની સીધી અસર ભારતની અર્થવ્યવસ્થા પર પડશે અને દેશમાં મોંઘવારી વધશે. મોંઘવારી વધવાથી દરેક સેક્ટર પર તેની આડઅસર જોવા મળશે.