ગુજરાતમાં માવઠાનો કહેર: 10 લાખ હેક્ટર પાક તબાહ, ખેડૂતોની આંખમાં આંસુ, 7 દિવસમાં સર્વેનો આદેશ

Farmers Devastated in Gujarat: ગુજરાતના ખેડૂતો આ દિવસોમાં રાતા પાણીએ રડી રહ્યા છે. કમોસમી વરસાદ અને માવઠાના કારણે ખેતરોમાં પાણી ભરાઈ જતાં ઊભા પાક ધોવાઈ ગયા છે. સરકારી અંદાજ મુજબ, આખા રાજ્યમાં 10 લાખથી વધુ હેક્ટર વિસ્તારમાં ખેતીને નુકસાન થયું છે. આમાં શેરડી, સોયાબીન, તુવેર, મગફળી અને બાગાયતી પાકોનો સમાવેશ થાય છે.

સૌરાષ્ટ્રના જૂનાગઢ, ભાવનગર, અમરેલી સહિત પાંચેક જિલ્લામાં સૌથી વધુ અસર જોવા મળી છે. અહીં મગફળી અને કપાસ જેવા રોકડિયા પાકોને ભારે ફટકો પડ્યો છે. દક્ષિણ ગુજરાતમાં ડાંગર અને અન્ય પાકો પાણીમાં ડૂબી ગયા છે, જ્યારે ઉત્તર ગુજરાત પણ આ તબાહીથી બાકાત રહ્યું નથી.

હવામાન વિભાગે આગાહી આપી છે કે આગામી 3 દિવસમાં ઘણા જિલ્લામાં ભારે વરસાદ પડી શકે છે, જેનાથી નુકસાન વધવાની શક્યતા છે.

સરકારે ત્વરિત પગલાં લીધાં છે. કેબિનેટ મંત્રીઓને અસરગ્રસ્ત વિસ્તારોમાં મોકલીને રિપોર્ટ મેળવવામાં આવ્યો હતો. આજે કેબિનેટ બેઠકમાં આ રિપોર્ટ રજૂ કરાયો અને આગામી 7 દિવસમાં પાક નુકસાનીનો સંપૂર્ણ સર્વે કરવાનો આદેશ આપવામાં આવ્યો છે. સર્વેના આધારે ખેડૂતોને રાહત સહાય ઝડપથી ચૂકવવામાં આવશે.

આ તબાહીએ ખેડૂતોની આર્થિક સ્થિતિને ખરાબ કરી દીધી છે. ઘણા ખેડૂતોએ લોન લઈને પાક ઊભો કર્યો હતો, જે હવે પાણીમાં વહી ગયો છે. સરકાર પાસે ખેડૂતોની મુખ્ય અપેક્ષા છે કે રાહત પેકેજમાં વીમા ક્લેમ સાથે વધારાની સહાય મળે.

આ ઘટના ફરી એકવાર ક્લાઈમેટ ચેન્જની અસર દર્શાવે છે, જ્યાં કમોસમી વરસાદ ખેતી માટે મોટો ખતરો બની રહ્યો છે. ખેડૂતોને સલાહ છે કે તેઓ તાત્કાલિક પંચનામું કરાવે અને સ્થાનિક તલાટી કે કૃષિ અધિકારીને જાણ કરે.

આ પણ વાંચો- નવેમ્બર 2025થી નવા નિયમો: આધાર, બેંકિંગ અને ક્રેડિટ કાર્ડ પર મોટી અસર, જાણો તમારા પર કેટલી અસર પડશે