Weather Update: દિલ્હીમાં વરસાદ નહિ, પરંતુ UP-બિહાર સહિત દેશના 22 રાજ્યોમાં ભારે વરસાદનું એલર્ટ, જાણો લેટેસ્ટ હવામાન અપડેટ

Weather Update: સમગ્ર દેશમાં અત્યારે ચોમાસાની જમાવટ જોવા મળી રહી છે. ઘણા રાજ્યોમાં પડી રહેલા ભારે વરસાદે લોકોની મુશ્કેલીઓમાં વધારો કર્યો છે. આ દરમિયાન, ભારતીય હવામાન વિભાગ દ્વારા આગામી થોડા કલાકોમાં દેશના 22 રાજ્યોમાં વરસાદનું એલર્ટ જાહેર કરવામાં આવ્યું છે. દિલ્હીવાસીઓને હજુ વરસાદ માટે રાહ જોવી પડશે, જ્યારે કેટલાક રાજ્યોમાં પૂર જેવી સ્થિતિ સર્જાઈ શકે છે.

આગામી 3 થી 4 દિવસ કેવું રહેશે હવામાન?

હવામાન વિભાગની લેટેસ્ટ માહિતી મુજબ, આવનારા 3 થી 4 દિવસોમાં બિહાર, પશ્ચિમ બંગાળ અને પૂર્વોત્તર ભારતના રાજ્યોમાં અતિભારે વરસાદ ખાબકી શકે છે. જ્યારે બીજી તરફ, આંધ્રપ્રદેશ અને તેની આસપાસના વિસ્તારોમાં 15 જુલાઈ સુધી ગરમ પવનો ફૂંકાવાની શક્યતા છે. ઓડિશા અને તમિલનાડુમાં પણ હવામાન ગરમ અને ભારે ભેજવાળું રહેશે. નોંધનીય છે કે ગત દિવસે પણ હવામાન વિભાગે 18 રાજ્યો માટે વરસાદ અને વાવાઝોડાની ચેતવણી આપી હતી.

કયા 22 રાજ્યોમાં છે વરસાદની આગાહી?

હવામાન વિભાગના જણાવ્યા અનુસાર, આગામી થોડા કલાકોમાં દેશના 22 રાજ્યોમાં મેઘમહેર થઈ શકે છે. આ રાજ્યોમાં ઉત્તર પ્રદેશ, બિહાર, ઉત્તરાખંડ, હિમાચલ પ્રદેશ, રાજસ્થાન, પંજાબ, હરિયાણા, મધ્ય પ્રદેશ, છત્તીસગઢ, મહારાષ્ટ્ર, તેલંગાણા, સિક્કિમ અને અસમનો સમાવેશ થાય છે.

દિલ્હી-NCR માં વરસાદ નહિ, બફારો સતાવશે

દિલ્હી અને તેની આસપાસના વિસ્તારોમાં છેલ્લા કેટલાક દિવસોથી થયેલા વરસાદ બાદ હવે હવામાનનો મિજાજ બદલાવા જઈ રહ્યો છે. 14 થી 18 જુલાઈ વચ્ચે દિલ્હીમાં વરસાદ પડવાની શક્યતા બિલકુલ નહિવત્ છે. આકાશમાં વાદળોની આવન-જાવન રહેશે, પરંતુ તડકો નીકળવાને કારણે તાપમાનમાં વધારો થશે અને લોકોને ભારે ઉકળાટ અને બફારાનો સામનો કરવો પડશે.