હવે મુંબઈથી વડોદરાનું અંતર માત્ર 4 કલાકમાં, જાણો ક્યારે ખૂલશે દિલ્હી-મુંબઈ એક્સપ્રેસવેનો મહત્વનો હિસ્સો

હવે મુંબઈ અને વડોદરા વચ્ચે મુસાફરી કરવી વધુ ઝડપી અને આરામદાયક બનવા જઈ રહી છે. દિલ્હી-મુંબઈ એક્સપ્રેસવેના વડોદરા-મુંબઈ સેક્શનનું કામ હવે અંતિમ તબક્કામાં છે. મહારાષ્ટ્રના મુખ્યમંત્રી દેવેન્દ્ર ફડણવીસના જણાવ્યા અનુસાર, આ મહત્વકાંક્ષી પ્રોજેક્ટનો મહારાષ્ટ્રનો હિસ્સો 31 ઓગસ્ટ, 2026 સુધીમાં વાહન વ્યવહાર માટે ખુલ્લો મૂકવાનું લક્ષ્ય રાખવામાં આવ્યું છે.

મુસાફરીનો સમય થશે અડધો

હાલમાં મુંબઈથી વડોદરા પહોંચવામાં લગભગ 8 કલાક જેટલો સમય લાગે છે, પરંતુ આ એક્સપ્રેસવે કાર્યરત થયા બાદ આ મુસાફરી માત્ર 4 કલાકમાં પૂરી થઈ શકશે. 1,400 કિલોમીટર લાંબો અને 8-લેન ધરાવતો આ દિલ્હી-મુંબઈ એક્સપ્રેસવે ભારત સરકારના સૌથી મોટા ઈન્ફ્રાસ્ટ્રક્ચર પ્રોજેક્ટ્સમાંનો એક છે. આ પ્રોજેક્ટ પાછળ અંદાજે 1 લાખ કરોડ રૂપિયાનો ખર્ચ કરવામાં આવ્યો છે.

પ્રોજેક્ટની ખાસ વાતો

કનેક્ટિવિટી: આ એક્સપ્રેસવે હરિયાણા, રાજસ્થાન, મધ્ય પ્રદેશ, ગુજરાત અને મહારાષ્ટ્ર એમ પાંચ રાજ્યોને જોડે છે.

મહારાષ્ટ્ર સેક્શન: આ સેક્શન આશરે 157 કિલોમીટર લાંબો છે, જેનો ખર્ચ 24,000 કરોડ રૂપિયા થવાનો અંદાજ છે.

બાંધકામ: સમગ્ર પ્રોજેક્ટને 7 પેકેજમાં વહેંચવામાં આવ્યો છે, જેમાંથી 5 પેકેજનું કામ પૂર્ણ થઈ ગયું છે અને ટ્રાફિક માટે તૈયાર છે. બાકીના 2 પેકેજનું કામ ઓગસ્ટ 2026 સુધીમાં પૂરું થઈ જશે.