સ્ટારલિંકને ભારતમાં સર્વિસ શરૂ કરવાનું મળ્યું લાઇસન્સ, નેટવર્ક વિના પણ થઈ શકશે કોલિંગ અને હાઇ-સ્પીડ ઇન્ટરનેટ

Starlink satellite Broadband: એલન મસ્કની કંપની સ્ટારલિંકને ભારતમાં સૅટેલાઇટ બ્રોડબેન્ડ સર્વિસ શરૂ કરવા માટે લાંબા સમયની રાહ જોયા બાદ આખરે લાઇસન્સ મળી ગયું છે. ભારતીય સ્પેસ કોમ્યુનિકેશન રેગ્યુલેટર INSPACe દ્વારા સ્ટારલિંકને આ લાઇસન્સ આપવામાં આવ્યું છે, જેના કારણે હવે દેશમાં હાઇ-સ્પીડ ઇન્ટરનેટ અને ઇમરજન્સી કોલિંગની સુવિધા ઉપલબ્ધ થશે.

5 વર્ષનું લાઇસન્સ મળ્યું

એક અહેવાલ મુજબ, સ્ટારલિંકને ભારતમાં સ્પેસ-આધારિત ઇન્ટરનેટ સર્વિસ શરૂ કરવા માટે 5 વર્ષનું લાઇસન્સ આપવામાં આવ્યું છે. કંપની લો અર્થ ઓર્બિટ (LEO) સૅટેલાઇટની Gen 1 ક્ષમતા દ્વારા બ્રોડબેન્ડ સર્વિસ પૂરી પાડશે. જોકે, સ્ટારલિંક હજુ તરત જ કમર્શિયલ સર્વિસ શરૂ નહીં કરે, કારણ કે કંપનીએ સ્પેક્ટ્રમ ફાળવણીની રાહ જોવી પડશે.

નેટવર્ક વિના કોલિંગની સુવિધા

સ્ટારલિંકની સર્વિસ શરૂ થતાં ઇમરજન્સી સ્થિતિમાં મોબાઇલ નેટવર્ક વિના પણ કોલિંગ શક્ય બનશે. આ ઉપરાંત, યુઝર્સને હાઇ-સ્પીડ ઇન્ટરનેટની સુવિધા પણ મળશે. અહેવાલો અનુસાર, સ્ટારલિંકની સર્વિસ માટે દર મહિને આશરે 3,300 રૂપિયાનો ખર્ચ આવી શકે છે. સ્પેસએક્સના LEO સૅટેલાઇટ્સ દ્વારા આ સર્વિસ પૂરી પાડવામાં આવશે.

સરકારનો સંપૂર્ણ સહયોગ

કેન્દ્રીય ટેલિકોમ મંત્રી જ્યોતિરાદિત્ય સિંધિયાએ જણાવ્યું હતું કે સ્ટારલિંકની સસ્તી સૅટેલાઇટ-આધારિત સર્વિસને ભારતમાં લાવવા માટે તમામ રેગ્યુલેટરી પ્રક્રિયાઓ પૂર્ણ કરવામાં આવી છે. INSPACeના ચેરમેન પવન ગોયનકાએ પણ પુષ્ટિ કરી છે કે સ્ટારલિંકની લાઇસન્સ સંબંધિત તમામ જરૂરિયાતો પૂરી કરવામાં આવી છે.