મિડલ ઈસ્ટમાં યુદ્ધનો ખતરો: હોર્મુઝમાંથી પસાર થતા ઓઈલ ટેન્કરોને સુરક્ષા આપશે અમેરિકન નેવી, ડોનાલ્ડ ટ્રમ્પની મોટી જાહેરાત

Donald Trump US Navy on Strait of Hormuz: પશ્ચિમ એશિયા (મિડલ ઈસ્ટ) માં સતત વધી રહેલા તણાવ અને ક્રૂડ ઓઈલની સપ્લાય ખોરવાઈ જવાના ડર વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે એક મોટું નિવેદન આપ્યું છે. તેમણે સ્પષ્ટ કર્યું છે કે ખાડી દેશોમાં દરિયાઈ વેપારને સુરક્ષિત કરવા માટે અમેરિકા તરત જ મોટા પગલાં લેશે. આમાં શિપિંગ કંપનીઓને પોલિટિકલ રિસ્ક ઇન્શ્યોરન્સ આપવાથી લઈને હોર્મુઝની સામુદ્રધુનીમાંથી પસાર થતા ઓઈલ ટેન્કરોને અમેરિકન નેવીની સુરક્ષા આપવાનો પણ સમાવેશ થાય છે.

શિપિંગ કંપનીઓને મળશે સ્પેશિયલ ઇન્શ્યોરન્સ

ટ્રમ્પે પોતાના સોશિયલ મીડિયા પ્લેટફોર્મ ‘ટ્રુથ સોશિયલ' પર માહિતી આપતા લખ્યું છે કે, તેમણે યુનાઈટેડ સ્ટેટ્સ ડેવલપમેન્ટ ફાઇનાન્સ કોર્પોરેશન (DFC) ને ખાસ આદેશ આપ્યો છે. આ આદેશ મુજબ ખાડી વિસ્તારમાંથી પસાર થતા જહાજો અને ખાસ કરીને ઉર્જા (ઓઈલ-ગેસ) સપ્લાય કરતા જહાજોને પોલિટિકલ રિસ્ક ઇન્શ્યોરન્સ અને ગેરંટી પૂરી પાડવામાં આવશે. આ સુવિધા તમામ શિપિંગ કંપનીઓ માટે વ્યાજબી ભાવે ઉપલબ્ધ રહેશે.

અમેરિકન નેવી આપશે એસ્કોર્ટ સુરક્ષા

ટ્રમ્પે દુનિયાને અમેરિકાની આર્થિક અને લશ્કરી તાકાતનો અહેસાસ કરાવતા કહ્યું કે, "જો જરૂર પડશે તો અમેરિકન નેવી હોર્મુઝની સામુદ્રધુનીમાંથી પસાર થતા તમામ ઓઈલ ટેન્કરોને વહેલી તકે એસ્કોર્ટ કરવાનું (સાથે રહીને સુરક્ષા આપવાનું) શરૂ કરી દેશે. કોઈપણ સંજોગોમાં અમેરિકા આખી દુનિયામાં ઉર્જાનો સપ્લાય અટકવા દેશે નહીં. આવનારા સમયમાં હજુ વધુ કડક પગલાં લેવામાં આવશે."

શા માટે મહત્વનો છે હોર્મુઝનો રૂટ?

હોર્મુઝની સામુદ્રધુની એ પર્શિયન ગલ્ફ અને ઓમાનના અખાતને જોડતો એક ખૂબ જ સાંકળો અને મહત્વનો દરિયાઈ માર્ગ છે. દુનિયાભરનું મોટાભાગનું ક્રૂડ ઓઈલ અને LNG આ જ રસ્તેથી પસાર થાય છે. હાલમાં આ માર્ગ સળંગ 4 દિવસથી બંધ જેવો જ છે. યાહૂ ફાઇનાન્સના ડેટા મુજબ, આ યુદ્ધની સ્થિતિને કારણે બ્રેન્ટ ક્રૂડનો ભાવ બેરલ દીઠ લગભગ 82.29 ડોલરની આસપાસ પહોંચી ગયો છે, જે બજારની અસ્થિરતા દર્શાવે છે.