ટ્રમ્પની ડબલ ગેમ: ભારત સાથે દોસ્તીની વાતો, EUને 100% ટેરિફનો મંત્ર! સમજો સંપૂર્ણ પોલિટિક્સ

અમેરિકી રાષ્ટ્રપતિ ડોનાલ્ડ ટ્રમ્પે યુરોપિયન યુનિયન (EU)ને ભારત અને ચીન પર 100% ટેરિફ લગાવવાનો આગ્રહ કર્યો છે, જેથી રશિયાના રાષ્ટ્રપતિ વ્લાદિમીર પુતિન પર આર્થિક દબાણ વધારી શકાય. આ અપીલથી રાજકીય અને વેપારી વર્તુળોમાં ખળભળાટ મચી ગયો છે, કારણ કે ટ્રમ્પ એક તરફ ભારત સાથે વેપારી સંબંધો સુધારવાની વાત કરે છે, તો બીજી તરફ આવી આકરી નીતિની હિમાયત કરે છે.

રોયટર્સના અહેવાલ મુજબ, ટ્રમ્પે EUના સેન્ક્શન્સ એન્વોય ડેવિડ ઓ’સુલિવન સાથેની એક કોન્ફરન્સ કોલમાં આ માંગણી કરી હતી, જ્યારે EUનું ડેલિગેશન વોશિંગ્ટનમાં સેન્ક્શન્સ પર ચર્ચા કરી રહ્યું હતું. એક અમેરિકી અધિકારીએ જણાવ્યું, “અમે તૈયાર છીએ, પરંતુ અમે આગળ ત્યારે જ વધીશું જ્યારે EU અમારી સાથે આવે.”

ટ્રમ્પની દલીલ છે કે ભારત અને ચીન રશિયા પાસેથી મોટા પ્રમાણમાં તેલ ખરીદી રહ્યા છે, જે યુક્રેન યુદ્ધ બાદ રશિયાની અર્થવ્યવસ્થાને ટેકો આપે છે. તેમણે EUને સ્પષ્ટ કહ્યું કે, “આપણે સૌ ટેરિફ લગાવીએ, જ્યાં સુધી ચીન રશિયન તેલ ખરીદવાનું બંધ ન કરે.” EUના એક રાજદ્વારીએ જણાવ્યું કે જો બ્રસેલ્સ આવું પગલું ભરે, તો અમેરિકા પણ સમાન ટેરિફ લગાવશે.

આ રણનીતિ EUની હાલની નીતિથી અલગ છે, કારણ કે EU રશિયાને અલગ-થલગ કરવા માટે સેન્ક્શન્સ પર ધ્યાન આપે છે, ટેરિફ નહીં. ફાઇનાન્શિયલ ટાઇમ્સના અહેવાલ મુજબ, EU દેશો ભારત અને ચીન પર સેકન્ડરી સેન્ક્શન્સ લગાવવા વિચારી રહ્યા છે, પરંતુ વેપારી સંબંધોને ધ્યાનમાં રાખીને આ નિર્ણય સંવેદનશીલ છે.

ભારત અને ચીન રશિયન તેલના મુખ્ય ખરીદદારો છે, જે યુક્રેન યુદ્ધ બાદ મોસ્કોની આર્થિક જીવનરેખા બન્યા છે. ટ્રમ્પે અગાઉ ભારત પર 50% ટેરિફ લગાવ્યો છે, જેમાં 25% ટેરિફ રશિયન તેલની ખરીદીને કારણે ઉમેરાયો હતો.

આ બધા વચ્ચે ટ્રમ્પે સોશિયલ મીડિયા પર ભારત સાથે વેપારી અવરોધો દૂર કરવાની અને વડાપ્રધાન નરેન્દ્ર મોદી સાથે ચર્ચા કરવાની ઇચ્છા વ્યક્ત કરી છે. નિષ્ણાતોનું માનવું છે કે આ ડબલ ગેમ રશિયા પર દબાણ વધારવાની રણનીતિ હોઈ શકે, પરંતુ તેનાથી ભારત અને EU સાથેના વેપારી સંબંધો પર નકારાત્મક અસર પડી શકે છે. આગામી દિવસોમાં EU, ભારત અને ચીન વચ્ચેની ચર્ચાઓ આ મુદ્દાને કઈ દિશામાં લઈ જશે, તે જોવું રહ્યું.

આ પણ વાંચો- નેપાળની કટોકટી: ચીનના દેવાના જાળમાં ફસાયેલું રાષ્ટ્ર, Gen-Z ક્રાંતિ લાવશે બદલાવ?