શેરબજારમાં મોટો કડાકો: સેન્સેક્સ 780 પોઈન્ટ તૂટ્યો, નિફ્ટી 24000ની નીચે, IT ઇન્ડેક્સ 6% ગગડ્યો

Share Market : શુક્રવાર 19 જૂનના રોજ ભારતીય શેરબજારમાં રોકાણકારો માટે મોટો આંચકો આવ્યો છે. ગ્લોબલ માર્કેટના મિશ્ર સંકેતો વચ્ચે આજે બજાર ખુલતાની સાથે જ મોટો કડાકો જોવા મળ્યો છે. દિગ્ગજ આઈટી કંપની એક્સેન્ચર દ્વારા જાહેર કરાયેલા નબળા રેવન્યુ ગાઈડન્સના કારણે ભારતીય આઈટી શેરોમાં જોરદાર વેચવાલી શરૂ થઈ ગઈ છે. આ નકારાત્મક અસરને લીધે સેન્સેક્સ અને નિફ્ટી બંને ઇન્ડેક્સ ધબડકો ખાઈને નીચે આવી ગયા છે.

સવારે બજારમાં ભારે ગાબડું પડ્યું હતું. સેન્સેક્સ 732.19 પોઈન્ટ અથવા 0.95 ટકાના ઘટાડા સાથે 76677.79 ના સ્તરે પહોંચી ગયો હતો, જ્યારે થોડી જ વારમાં આ ઘટાડો 780 પોઈન્ટ સુધી વધી ગયો હતો. બીજી તરફ નિફ્ટી 50 ઇન્ડેક્સ પણ 200.10 પોઈન્ટ અથવા 0.83 ટકા તૂટીને 24000 ની મનોવૈજ્ઞાનિક સપાટી તોડી 23967.90 પર ટ્રેડ કરતો જોવા મળ્યો હતો. સવારના ટ્રેડિંગમાં અંદાજે 956 શેર ગ્રીન ઝોનમાં હતા, જ્યારે 1324 શેરોમાં ઘટાડો નોંધાયો હતો અને 178 શેર કોઈ પણ ફેરફાર વગર ટ્રેડ થઈ રહ્યા હતા.

IT ઇન્ડેક્સમાં 6 ટકાનો મોટો ભંગાણ

સેક્ટર વાઈઝ પરફોર્મન્સની વાત કરીએ તો આજે આઈટી સેક્ટરમાં ભારે કટોકટી જોવા મળી રહી છે. નિફ્ટી IT ઇન્ડેક્સ લગભગ 6 ટકા સુધી ગગડી જતાં બજારમાં હાહાકાર મચી ગયો છે. નિફ્ટી 50 ઇન્ડેક્સમાં ઇન્ફોસિસ, ટેક મહિન્દ્રા અને ટીસીએસ (TCS) ટોપ લૂઝર્સ સાબિત થયા છે. આ સિવાય એચસીએલ ટેક અને વિપ્રોના શેરમાં પણ મોટો ઘટાડો નોંધાયો છે. આઈટી ઉપરાંત નિફ્ટી રિયલ્ટી અને કન્ઝ્યુમર ડ્યુરેબલ્સ સેક્ટર પર પણ દબાણ જોવા મળી રહ્યું છે. જોકે આ મંદીની વચ્ચે પણ નિફ્ટી ફાર્મા અને હેલ્થકેર સેક્ટરે થોડું સારું પ્રદર્શન કરીને બજારને ટેકો આપવાનો પ્રયાસ કર્યો છે.

મિડકેપ અને સ્મોલકેપમાં પણ નબળાઈ

મોટા માર્કેટની સ્થિતિ પણ ચિંતાજનક છે. બ્રોડર માર્કેટમાં નિફ્ટી મિડકેપ ઇન્ડેક્સ 0.55 ટકા અને નિફ્ટી સ્મોલકેપ ઇન્ડેક્સ 0.19 ટકા નીચે ટ્રેડ કરી રહ્યા છે.

આજના ટ્રેડિંગ સેશનમાં શૈલી એન્જિનિયરિંગ પ્લાસ્ટિક્સ, હોરાઇઝન રિક્લેમ, વિપ્રો, HCL ટેક્નોલોજીસ, એમ્બર એન્ટરપ્રાઇઝિસ, HDFC બેન્ક, ઇમેજિકાવર્લ્ડ એન્ટરટેઇનમેન્ટ, ડાયમંડ પાવર ઇન્ફ્રાસ્ટ્રક્ચર, ટ્રુઅલ્ટ બાયોએનર્જી, બોશ હોમ કમ્ફર્ટ, ભારત ફોર્જ, હિંડાલ્કો ઇન્ડસ્ટ્રીઝ અને એન્થમ બાયોસાયન્સિસ જેવા શેરો ચર્ચામાં અને ફોકસમાં રહેશે.