શેરબજારમાં બમ્પર તેજી: સેન્સેક્સમાં 993 પોઈન્ટનો જોરદાર ઉછાળો, રોકાણકારો થયા માલામાલ; જાણો માર્કેટ ગજાવનારા 4 મુખ્ય કારણો

Stock Market Rally: ભારતીય શેરબજારમાં સતત ઉતાર-ચઢાવ વચ્ચે આજે રોકાણકારો માટે સારા સમાચાર આવ્યા છે. એક દિવસના ઘટાડા બાદ 29 એપ્રિલે બજારમાં ફરી રોનક જોવા મળી છે. સેન્સેક્સ અને નિફ્ટી બંને ઇન્ડેક્સ લીલા નિશાનમાં ખુલ્યા અને જોતજોતામાં તેમાં મોટો ઉછાળો જોવા મળ્યો હતો.

આજના કારોબાર દરમિયાન સેન્સેક્સ તેની અગાઉની ક્લોઝિંગથી 992.77 પોઈન્ટ ઉછળીને 77,879.68 ની ઊંચી સપાટીએ પહોંચ્યો હતો. તેવી જ રીતે, નિફ્ટી પણ 303.25 પોઈન્ટના વધારા સાથે 24,298.95 ના હાઈ લેવલ પર જોવા મળ્યો હતો. નોંધનીય છે કે 28 એપ્રિલે બજારમાં ભારે વોલેટિલિટી હતી અને અંતે તે ઘટાડા સાથે બંધ થયું હતું, પરંતુ આજે ચિત્ર સંપૂર્ણ બદલાઈ ગયું છે.

બજારમાં આવેલી આ શાનદાર તેજી પાછળ મુખ્ય 4 કારણો જવાબદાર માનવામાં આવે છે:

1. નીચલા સ્તરેથી ‘વેલ્યુ બાઈંગ'

ગયા ટ્રેડિંગ સેશનમાં બજારમાં આવેલા ઘટાડાને કારણે ઘણા સારા શેરો સસ્તા ભાવે ઉપલબ્ધ હતા. આ તકનો લાભ લઈને રોકાણકારોએ નીચલા સ્તરેથી ખરીદી શરૂ કરી, જેને 'વેલ્યુ બાઈંગ' કહેવામાં આવે છે. ખાસ કરીને ઓટો, રિયાલ્ટી, IT અને FMCG સેક્ટરમાં રોકાણકારોએ ભારે રસ દાખવ્યો, જેના કારણે બજારને વેગ મળ્યો.

2. કાચા તેલના ભાવમાં ઘટાડો

ભારત માટે સૌથી રાહતના સમાચાર ઇન્ટરનેશનલ માર્કેટમાંથી આવ્યા છે. બ્રેન્ટ ક્રૂડની કિંમત 0.21 ટકા ઘટીને 111 ડોલર પ્રતિ બેરલ પર આવી ગઈ છે. ભારત તેની જરૂરિયાતનું 85 ટકા તેલ આયાત કરે છે, તેથી જ્યારે પણ તેલ સસ્તું થાય છે, ત્યારે દેશનું ઈમ્પોર્ટ બિલ ઘટે છે અને રૂપિયા પરનું દબાણ ઓછું થાય છે. તેનાથી ટ્રાન્સપોર્ટ અને મેન્યુફેક્ચરિંગ સેક્ટરની કંપનીઓનો ખર્ચ પણ ઘટે છે.