શેરબજારમાં ભૂકંપ: સેન્સેક્સ 999 પોઈન્ટ તૂટ્યો, નિફ્ટી 23,900ની નીચે સરક્યો; જાણો રોકાણકારોના પૈસા ડૂબવા પાછળના 5 મોટા કારણો

Share Market Crash: ભારતીય શેરબજારમાં આજે કાળા શુક્રવાર જેવો માહોલ જોવા મળ્યો છે. સતત ત્રણ દિવસના ઘટાડા બાદ આજે બજારમાં મોટો કડાકો બોલાઈ ગયો છે. સેન્સેક્સ અને નિફ્ટી બંને ઇન્ડેક્સમાં ભારે વેચવાલીને કારણે રોકાણકારોના કરોડો રૂપિયા ધોવાઈ ગયા છે. આ અઠવાડિયું શેરબજાર માટે ખૂબ જ ખરાબ સાબિત થયું છે, જેમાં સેન્સેક્સ અને નિફ્ટીમાં લગભગ 2-2 ટકાનો ઘટાડો નોંધાયો છે.

નિફ્ટી 23,900ની નીચે જતાં ચિંતા વધી

આજે દિવસના અંતે નિફ્ટી 23,900ના મહત્વના સ્તરની નીચે બંધ આવ્યો છે, જે બજારના નબળા સેન્ટિમેન્ટ તરફ ઈશારો કરે છે. છેલ્લા બે અઠવાડિયાથી બજારમાં જે તેજી જોવા મળી હતી, તેના પર હવે બ્રેક લાગી ગઈ છે. માત્ર મોટા શેરો જ નહીં, પરંતુ મિડકેપ અને સ્મોલકેપ ઈન્ડેક્સમાં પણ 1-1 ટકાનો ઘટાડો જોવા મળ્યો છે, જેના કારણે સામાન્ય રોકાણકારોને પણ મોટું નુકસાન થયું છે.

આઇટી શેરોમાં ભારે ધોવાણ: ઇન્ફોસિસ 7 ટકા તૂટ્યો

બજારને નીચે ખેંચવામાં સૌથી મોટો હાથ આઇટી (IT) સેક્ટરનો રહ્યો છે. નિફ્ટીના ટોપ લુઝર્સમાં Infosys, HCL Tech, TCS અને Tech Mahindra જેવા દિગ્ગજ શેરો સામેલ હતા. ખાસ કરીને ઇન્ફોસિસના નબળા ગાઇડન્સને કારણે આખા સેક્ટર પર દબાણ વધ્યું હતું. ઇન્ફોસિસનો શેર 7 ટકા જેટલો તૂટીને 1,154 રૂપિયા પર આવી ગયો છે, જે જૂન 2023 પછીનું તેનું સૌથી નીચું સ્તર છે.

ક્રૂડ ઓઇલ અને નિષ્ણાતોનો મત

બજારના નિષ્ણાતોના મતે, બ્રેન્ટ ક્રૂડ ઓઇલના ભાવ વધીને 106 ડોલર પ્રતિ બેરલ પર પહોંચી ગયા છે. ક્રૂડના વધતા ભાવને કારણે ભારતીય રૂપિયો નબળો પડી રહ્યો છે અને તે કંપનીઓ માટે ખર્ચ વધી જશે જે ઉત્પાદનમાં ક્રૂડનો ઉપયોગ કરે છે. ટેકનિકલ રીતે જોવામાં આવે તો નિફ્ટી તેના 20-Day EMA સ્તરથી નીચે સરકી ગયો છે. હવે નિફ્ટી માટે 23,600-23,550 મહત્વનો સપોર્ટ છે, જો તે તૂટશે તો બજાર 23,150 સુધી પણ જઈ શકે છે.