ભારતીય શેરબજાર પર વિદેશી રોકાણકારો ઓળઘોળ: ઓગસ્ટમાં અત્યાર સુધીમાં 16621 કરોડ રૂપિયાની કરી જોરદાર ખરીદી

FPIs Buying in August: ભારતીય શેરબજારમાં વિદેશી પોર્ટફોલિયો રોકાણકારોનો વિશ્વાસ સતત વધી રહ્યો છે. ઓગસ્ટ મહિનામાં સતત બીજા મહિને વિદેશી રોકાણકારોની ખરીદીનો દોર ચાલુ રહ્યો છે. આંકડાઓ પર નજર કરીએ તો, ઓગસ્ટના પહેલા 15 દિવસમાં જ FPIએ ભારતીય શેરોમાં કુલ 16621 કરોડ રૂપિયાનું જંગી રોકાણ કર્યું છે.

શેરબજારમાં FPI રોકાણના મુખ્ય આંકડાઓ

ઓગસ્ટ અને જુલાઈની શાનદાર ખરીદી: ઓગસ્ટના 15 દિવસમાં 16621 કરોડ રૂપિયાના રોકાણ પહેલાં, જુલાઈ મહિનામાં પણ FPI એ 20200 કરોડ રૂપિયા ભારતીય બજારમાં ઠાલવ્યા હતા. જુલાઈ પહેલા સતત 4 મહિના સુધી તેમણે માત્ર વેચાણ જ કર્યું હતું.

ભૂતકાળનો ટ્રેન્ડ: સેન્ટ્રલ ડિપોઝિટરી સર્વિસિસ લિમિટેડના ડેટા મુજબ, વિદેશી રોકાણકારોએ જૂનમાં 49340 કરોડ, મે મહિનામાં 32963 કરોડ, એપ્રિલમાં 60847 કરોડ અને માર્ચમાં રેકોર્ડ 1.17 લાખ કરોડ રૂપિયાની તોતિંગ વેચવાલી કરી હતી. જ્યારે ફેબ્રુઆરીમાં 22615 કરોડ રૂપિયાનું રોકાણ કર્યું હતું.

વાર્ષિક આંકડા: તાજેતરની ખરીદી છતાં, વર્ષ 2026 માં અત્યાર સુધીમાં FPI દ્વારા ભારતીય શેરબજારોમાં લગભગ 2.4 લાખ કરોડ રૂપિયાનું વેચાણ કરવામાં આવ્યું છે. અગાઉ વર્ષ 2025 માં તેમણે 1.66 લાખ કરોડ રૂપિયાનું વેચાણ કર્યું હતું.

વિદેશી રોકાણકારો કેમ કરી રહ્યા છે ખરીદી?

બજારના નિષ્ણાતોના મતે, અન્ય દેશોના બજારોની સરખામણીમાં ભારતનું આકર્ષક વેલ્યુએશન, કંપનીઓના શાનદાર ત્રિમાસિક પરિણામો અને અમેરિકામાં વ્યાજ દરોમાં ઘટાડાની શક્યતાઓએ વિદેશી રોકાણકારોનો ભરોસો વધાર્યો છે. આ ઉપરાંત ક્રૂડ ઓઈલના નરમ ભાવો અને રૂપિયામાં ઓછો ઉતાર-ચઢાવ પણ ભારતીય બજાર માટે પોઝિટિવ સાબિત થયા છે.