FII માટે સરકારની મોટી જાહેરાત! સરકારી બોન્ડ્સમાં રોકાણ પર નહીં લાગે કોઈ ટેક્સ, કેબિનેટ લાવશે વટહુકમ

ભારતીય અર્થવ્યવસ્થા અને રૂપિયાને વૈશ્વિક સંકટથી બચાવવા માટે કેન્દ્ર સરકાર વિદેશી સંસ્થાકીય રોકાણકારોને ઇતિહાસની સૌથી મોટી ટેક્સ રાહત આપવાની તૈયારી કરી રહી છે. રિપોર્ટ્સ મુજબ, સરકાર વિદેશી રોકાણકારોને ભારતીય સરકારી સિક્યોરિટીઝમાં રોકાણ કરવા પર ટેક્સમાંથી સંપૂર્ણ મુક્તિ આપવા પર ગંભીરતાથી વિચાર કરી રહી છે.

આ મોટા નિર્ણયનો અમલ કરવા માટે કેબિનેટ એક ખાસ વટહુકમ લાવી શકે છે. આ ઐતિહાસિક રાહતના સમાચાર સામે આવતા જ, ગુરુવારે સવારે શરૂઆતી કારોબારમાં ભારતના બેન્ચમાર્ક 10-વર્ષના સરકારી બોન્ડની યીલ્ડ ઘટીને 7.01 ટકા પર આવી ગઈ હતી.

કયા બે મોટા ટેક્સ થશે સંપૂર્ણ નાબૂદ?

સૂત્રો પાસેથી મળતી માહિતી મુજબ, આ નવા વટહુકમ દ્વારા વિદેશી રોકાણકારો પર લાગતા બે સૌથી મોટા ટેક્સને સંપૂર્ણપણે હટાવી લેવામાં આવી શકે છે. પસંદગીની સરકારી સિક્યોરિટીઝ પર લાગતો 12.5 ટકાનો લોંગ-ટર્મ કેપિટલ ગેઇન્સ (LTCG) ટેક્સ સંપૂર્ણપણે ખતમ કરવામાં આવી શકે છે. સરકારી બોન્ડ્સમાંથી મળતા વ્યાજની આવક પર FII ને જે 20 ટકાનો ભારેખમ વિથહોલ્ડિંગ ટેક્સ ચૂકવવો પડતો હતો, તેને પણ શૂન્ય કરવામાં આવી શકે છે.

આ મોટા પગલાં પાછળ સરકારની રણનીતિ શું છે?

મિડલ ઈસ્ટમાં ચાલી રહેલા ઈરાન યુદ્ધ અને કાચા તેલના આસમાને પહોંચેલા ભાવના કારણે આ વર્ષે ભારતીય રૂપિયો 5 ટકાથી વધુ નબળો પડી ચૂક્યો છે. બીજી તરફ, વિદેશી પોર્ટફોલિયો રોકાણકારો સતત ભારતીય શેરબજારમાંથી પોતાના પૈસા પાછા ખેંચી રહ્યા છે.

આવા કપરા સમયમાં ટેક્સનો આ મોટો બોજ હટાવીને સરકારનો મુખ્ય ઉદ્દેશ્ય ભારતના ડેટ માર્કેટમાં વિદેશી મૂડીને ઝડપથી આકર્ષિત કરવાનો છે. જો વિદેશી ફંડ આવશે, તો રૂપિયાના ઘટાડાને રોકી શકાશે અને બોન્ડ માર્કેટમાં સીધો ડોલરનો પ્રવાહવધશે.