Havells India Q4 Results: હેવેલ્સના નફામાં 40%નો તોતિંગ ઉછાળો, રોકાણકારો માટે ડિવિડન્ડની લોટરી

Havells India Q4 Results: કન્ઝ્યુમર ઇલેક્ટ્રિકલ્સ ક્ષેત્રની દિગ્ગજ કંપની હેવેલ્સ ઇન્ડિયાએ માર્ચ ક્વાર્ટરના તેના નાણાકીય પરિણામો જાહેર કર્યા છે. કંપનીએ આ વખતે ઓપરેટિંગ સ્તરે અપેક્ષા કરતા સારું પ્રદર્શન કર્યું છે. પરિણામોની જાહેરાતની સાથે જ કંપનીએ તેના શેરધારકો માટે ડિવિડન્ડની પણ જાહેરાત કરી છે.

નફામાં મોટો ઉછાળો, પણ કારણ જાણવું જરૂરી

હેવેલ્સ ઇન્ડિયાનો નેટ પ્રોફિટ વાર્ષિક ધોરણે 40.6% વધીને 734 કરોડ રૂપિયા થયો છે. જોકે, આ નફા પાછળ કંપનીની 'અધર ઇન્કમ' (અન્ય આવક) નો મોટો હાથ રહ્યો છે. કંપનીની અન્ય આવક ગત વર્ષના 70 કરોડ રૂપિયાથી પાંચ ગણી વધીને 325.8 કરોડ રૂપિયા થઈ ગઈ છે. જેમાં 283 કરોડ રૂપિયાનો ફેર વેલ્યુ ગેઈન સામેલ છે. કંપનીની કુલ આવક (Revenue) 2.4% વધીને 6,687 કરોડ રૂપિયા નોંધાઈ છે.

કેબલ બિઝનેસ રહ્યો સુપરહિટ

કંપનીના કેબલ સેગમેન્ટમાં શાનદાર ગ્રોથ જોવા મળ્યો છે. પાવર કેબલ્સની વધતી માંગને કારણે આ સેગમેન્ટની આવકમાં 14% નો વધારો થયો છે. જ્યારે તેનો નફો (EBIT) 36% વધ્યો છે. જોકે, વાયર બિઝનેસમાં ગ્રોથ થોડો ધીમો રહ્યો છે. બીજી તરફ, લોઈડ (Lloyd) બિઝનેસ પર ગરમીની મોડી શરૂઆતને કારણે થોડું દબાણ જોવા મળ્યું હતું.

ડિવિડન્ડની જાહેરાત

હેવેલ્સના બોર્ડ ઓફ ડિરેક્ટર્સે નાણાકીય વર્ષ 2026 માટે 1ની ફેસ વેલ્યુ ધરાવતા દરેક શેર પર 6 ના ફાઈનલ ડિવિડન્ડની ભલામણ કરી છે.