HDFC બેન્કના નવા CEO કોણ બનશે? કૈઝાદ ભરૂચાનું નામ સૌથી આગળ, જાણો બેન્કનો આગળનો પ્લાન

HDFC Bank new CEO: ભારતની સૌથી મોટી પ્રાઇવેટ સેક્ટરની બેન્ક HDFC Bank માં ટૂંક સમયમાં મોટો ફેરફાર જોવા મળી શકે છે. બેન્કના હાલના એમડી અને CEO શશીધર જગદીશને પોતાના પદ પર ફરીથી નિમણૂક ન લેવાનો નિર્ણય કર્યો છે. એવી પૂરેપૂરી શક્યતા છે કે ઓક્ટોબર મહિનામાં બેન્ક નવા CEO ના નામની સત્તાવાર જાહેરાત કરી શકે છે. આ રેસમાં બેન્કના વર્તમાન ડેપ્યુટી મેનેજિંગ ડિરેક્ટર કૈઝાદ ભરૂચાનું નામ સૌથી મોખરે છે.

કૈઝાદ ભરૂચાનું નામ કેમ છે ચર્ચામાં?

કૈઝાદ ભરૂચા બેન્કના સૌથી અનુભવી અને જૂના અધિકારીઓમાંથી એક છે. હાલમાં તેઓ બેન્કના રિટેલ અને હોલસેલ બિઝનેસની કમાન સંભાળી રહ્યા છે. સૌથી અગત્યની વાત એ છે કે તેઓ 2029 માં નિવૃત્ત થવાના છે. RBI ના નિયમો અનુસાર, ફુલ-ટાઇમ ડિરેક્ટરનો મહત્તમ કાર્યકાળ 15 વર્ષનો હોઈ શકે છે. ભરૂચાના 15 વર્ષ 2029 માં પૂરા થશે, તેથી તેઓ આ પદ માટે એકદમ યોગ્ય ઉમેદવાર માનવામાં આવે છે. જરૂર પડ્યે કાર્યકાળની મર્યાદામાં છૂટ માટે પણ અરજી કરી શકાય છે.

ઉમેદવારની પણ શોધ ચાલુ

રોયટર્સના એક રિપોર્ટ અનુસાર, બેન્ક માત્ર આંતરિક જ નહીં પરંતુ બહારના યોગ્ય ઉમેદવારોની પણ શોધ કરી રહી છે. નિયમો મુજબ, બેન્કે CEO પદ માટે એક કરતા વધુ નામો રિઝર્વ બેન્ક (RBI) ને મોકલવા પડે છે. બેન્ક જે નામોનો પ્રસ્તાવ મુકશે, તેના પર અંતિમ મહોર RBI લગાવશે. જોકે, હાલમાં આ મુદ્દે બેન્ક કે કૈઝાદ ભરૂચા તરફથી કોઈ સત્તાવાર ટિપ્પણી કરવામાં આવી નથી.

શશીધર જગદીશને કેમ લીધો આવો નિર્ણય?

શનિવારે HDFC Bank દ્વારા શેરબજારને માહિતી આપવામાં આવી હતી કે શશીધર જગદીશને નવો કાર્યકાળ લેવાની ના પાડી દીધી છે. તેઓ ઓક્ટોબર 2020થી બેન્કના MD અને CEO છે. તેમનો આ બીજો કાર્યકાળ 26 ઓક્ટોબર 2026 ના રોજ પૂરો થઈ રહ્યો છે. જોકે, બેન્ક તરફથી તેમના આ નિર્ણય પાછળનું કોઈ ચોક્કસ કારણ જણાવવામાં આવ્યું નથી.